მოველით, რომ საქართველოში არჩევნები მშვიდ გარემოში ჩატარდება, ამის კარგი წინაპირობა კი თავისუფალი მედიაა- დონალდ ტუსკი

პოლიტიკა - 14:53, 08 Jun, 2016

1193

ევროპული საბჭოს პრეზიდენტისა და საქართველოს პრეზიდენტის შეხვედრის შემდეგ გიორგი მარგველაშვილმა და დონალდ ტუსკმა ერთობლივი პრესკონფერენცია გამართეს. ევროპული საბჭოს პრეზიდენტმა იმ მიღწევებზე ისაუბრა რაც საქართველოს ევროინტეგრაციის გზაზე აქვს და იმედი გამოთქვა, რომ ქვეყანა არჩევნების ტესტსაც წარმატებით ჩაატარებს:

„საქართველო-ევროკავშირის ურთიერთობაში წარმატებაა მიღწეული და მძლავრი და ძლიერი განწყობაა საქართველოს მოსახლეობის მხრიდან ევროპის მიმართ და დემოკრატიის გაძლიერებისა და სამართლებრივი სახელმწიფოს შენების გზაზე. ასოცირების ხელშეკრულება ნამდვილად კარგად მიმდინარეობს და აქედან მაქსიმალური სარგებლის მიღება უნდა მოხდეს“- აღნიშნა ტუსკმა.

დონალდ ტუსკი მოახლოებულ საპარლამენტო არჩევნებსაც შეეხო და არასასიამოვნო ფაქტად შეაფასა კორცხელში განვითარებული მოვლენები და ამასთანავე ხაზი გაუსვა მედიის თავისუფლების მნიშვნელობასაც.

„ოპოზიციის წარმომადგენლების მიმართ განხორციელებული გარკვეული ძალადობის ფაქტები ნამდვილად სამწუხაროა და კარგია, რომ მიღებული იქნება და მიღებულია შესაბამისი გადაწყვეტილებები, აღიძვრება საქმე და მადლობა ბატონო პრეზიდენტო, რომ თქვენ ნათლად დააფიქსირეთ თქვენი პოზიცია და ეს მოვლენები შესაბამისად შეაფასეთ . აღნიშნული ფაქტები ძალიან მნიშვნელოვანი გამოცდაა იმისთვის რომ შევამოწმოთ საქართველოს დემოკრატიის მოქნილობა და ძლიერება, ჩვენ მოველით, რომ საქართველოს ხელისუფლება ძალ-ღონეს არ დაიშურებს იმისათვის რომ არჩევნები მშვიდ გარემოში ჩატარდეს. ამის კარგი წინაპირობა კი თავისუფალი მედიაა.“- განაცხადა დონალდ ტუსკმა.

ევროპული საბჭოს პრეზიდენტმა პრესკონფერენციის მსვლელობისას კიდევ ერთხელ გამოხატა საქართველოს ტერიტორიული მთლიანობისა და სუვერენიტეტისადმი ევროკავშირის მტკიცე მხარდაჭერა.

დონალდ ტუსკის განცხადებით ევროკომისიამ დაადასტურა, რომ საქართველომ უვიზო რეჟიმის მისაღებად დაწესებული ყველა პირობა შეასრულა და იმედი გამოთქვა, რომ საქართველოსთვის ვიზალიბერალიზაციის დაწესება უახლოეს პერიოდში მოხდება.