ამერიკის სენატის საგარეო ურთიერთობათა კომიტეტის სხდომაზე ძირითადი განსახილველი თემები იყო რუსეთის აგრესია რეგიონში, ასევე საზღვრისა და ხელშეკრულებების დარღვევა. სხდომაზე მომხსენებელად სახელმწიფო მდივნის მოადგილე იყო მიწვეული.

ვიქტორია ნულანდის განცხადებით, შეერთებული შტატები ამ თანამშრომლობაში განსაკუთრებულ ყურადღებას საქართველოს თავდაცვისუნარიანობის გაძლიერებას დაუთმობს.

"ვარშავის სამიტზე ალიანსი კიდევ ერთხელ დაადასტურებს იმ გზავნილს, რაც საქართველოს წევრობაზე 2008 წელს გაჟღერდა. ვცდილობთ ხელახლა მოვახდინოთ ორიენტირება შეერთებული შტატებისა და საქართველოს, ასევე ნატო-საქართველოს ურთიერთობებზე უსაფრთხოების კუთხით. ეს გულისხმობს არა მხოლოდ იმას, რომ ქართული ჯარები მოვამზადოთ ავღანეთისთვის ან კოსოვოსთვის, არამედ უფრო მეტად ვიყოთ ორიენტირებული შიდა უსაფრთხოების საჭიროებებსა და ეროვნულ თავდაცვაზე.

რუსეთის ზეწოლის წინააღმდეგ საუკეთესო საშუალებაა წარმატებული და დემოკრატიული საქართველო. ამიტომ ვმუშაობთ მათთან სასამართლოს რეფორმაზე, სამართლის უზენაესობაზე, ძლიერი ინსტიტუტების ჩამოყალიბებაზე, ასევე ბაზრებზე წვდომის კუთხით. ჩვენ მხარს ვუჭერთ საქართველოს ევროკავშირთან ურთიერთობაშიც, რაც გულისხმობს სავაჭრო სარგებლის ნახვას, მაგალითად აფხაზებისთვის. ერთ დღესაც ამ ტერიტორიებმა შესაძლოა მიიღონ უფრო მეტი სარგებელი თბილისისგან, ვიდრე ნებისმიერი მეზობელი სთავაზობს მათ. ჩვენთვის მნიშვნელოვანია, რომ ვიყოთ საქართველოს მისწრაფებების მტკიცე მხარდამჭერები," - აღნიშნა ვიქტორია ნულანდმა.