„საქართველოს სახელმწიფოებრივი განვითარების ინსტიტუტი“ და „პედაგოგთა საკოორდინაციო ცენტრი“ ღია წერილით მიმართავს საქართველოს განათლებისა და მეცნიერების მინისტრს ალექსანდრე ჯეჯელავას:

„ჩვენი ორგანიზაციები ყურადღებით აკვირდება განათლების სისტემაში, კერძოდ საჯარო სკოლებში მიმდინარე პროცესებს.

საქართველოს განათლებისა და მეცნიერების მინისტრის 20 მაისის #419 ბრძანებით 2016 წლის 10 ივნისს დანიშნულია საქართველოს საჯარო სკოლების სამეურვეო საბჭოს წევრთა არჩევნები.

სამეურვეო საბჭოების დაკომპლექტებასთან დაკავშირებული პროცესები მიმდინარეობს საკმაოდ გაუმჭვირვალედ და საზოგადოების ნაკლები ინფორმირებულობის ფონზე, რაც ბადებს ლეგიტიმურ კითხვებს არჩევნების სამართლიანობასთან დაკავშირებით. განსაკუთრებით ეჭვებს ამძაფრებს ის გარემოება, რომ მოახლოებულია საპარლამენტო არჩევნები, რომლის დროსაც, კარგად მოგეხსენებათ, უკვე ტრადიციულად დიდ როლს თამაშობს „სკოლა“, როგორც არჩევნებში ხელისუფლების მიერ გამოყენებადი ადმინისტრაციული რესურსი.

ამ პროცესებთან დაკავშირებით ვრცელი საჯარო განმარტება გააკეთა პედაგოგთა საკოორდინაციო ცენტრმა, სადაც არგუმენტირებულადაა დასაბუთებული ის საეჭვო საკითხები, რაც გამოწვეულია პროცესის გაუმჭვირვალეობით.

საქართველოს სახელმწიფოებრივი განვითარების ინსტიტუტი, პედაგოგთა საკოორდინაციო ცენტრთან თანამშრომლობით ქმნის დროებით კომისიას, რომლის ამოცანა გახლავთ მონიტორინგი გაუწიოს საჯარო სკოლებში სამეურვეო საბჭოების დაკომპლექტების და მათშორის უაშუალოდ არჩევნებს და არჩევნების შემდგომ პროცესს, რათა სამეურვეო საბჭოების დაკომპლექტებასთან დაკავშირებით გაქარწყლდეს საზოგადოებაში არსებული ეჭვები. კომისია ღიაა ნებისმიერი დაინტერესებული ორგანიზაციისათვის და მათ შორის განათლებისა და მეცნიერების სამინისტროსთან თანამშრომლობისათვის, ასეთი სურვილის შემთხვევაში.

პედაგოგთა საკოორდინაციო ცენტრის მიერ გამართული საპროტესტო მარშის შემდეგ მინისტრის ცვლილება, ვფიქრობთ მესიჯია იმისა, რომ ხელისუფლება დაფიქრდა სკოლებში არსებულ წინასააჩევნო სიტუაციაზე. აქედან გამომდინარე, ჩვენ გამოვთქვამთ სურვილს პირადად შეგხვდეთ და უშუალოდ თქვენგან გავიგოთ თუ რა დამოკიდებულება გაქვთ სამეურვეო საბჭოების დაკომპლექტების პროცესებთან დაკავშირებით და მივიღოთ კომისიის მიერ სამეურვეო საბჭოების დაკომპლექტების პროცესში, მონიტორინგის შეუფერხებელი განხორციელების გარანტიები.

ჩვენი ჯგუფი ასევე აქტიურად აპროტესტებს „სკოლის რესურსის“ გამოყენებას ქვეყანაში სახელისუფლო არჩევნების დროს, კერძოდ საუბნო საარჩევნო კომისიების დაკომპლექტებას პედაგოგებით. თქვენთან აუდიენციის შემთხვევაში ჩვენ ასევე შევეცდებით გავიგოთ თქვენი პოზიცია მოახლოებულ საპარლამენტო არჩევნებში პედაგოგების ჩართულობასთან დაკავშირებით. ცხადია, ამ საკითხთან დაკავშირებით ჩვენ ასევე ვგეგმავთ კონსულტაციებს ცესკოსთან“, - ნათქვამია წერილში.