"ქუჩები ხალხით აქ ვერ გაივსება, სხვანაირი წარმოდგენაა „რუსთავი2“-ზე"- ივანიშვილი იან კელის განცხადებაზე

პოლიტიკა - 13:34, 07 Jun, 2016

3367

ივანიშვილი რუსთავი 2-ის სასამართლოსთან დაკავშირებით აშშ-ის ელჩის მიერ გაკეთებულ განცხადებასაც გამოეხმაურა და აღნიშნა, რომ იან კელის აშფოთებს ის საკითხი, რომ აღნიშნულმა მოვლენებმა არჩევნებზე ცუდი ეფექტი არ მოახდინოს, რაც მისთვის მისაღები და გასაგებია. ყოფილი პრემიერი აცხადებს, რომ ამ თემაზე იან კელისთან შეხვედრა და საუბარი ჰქონდა და მათი აზრები თანხვედრაშია.

„ის რომ არჩევნებამდე დარჩენილია რამდენიმე თვე და შეიძლება შეიცვალოს ტელევიზიის მენეჯმენტი, ეს მე არ მსურს, რადგან ევროპა და ამერიკა ამას ვერ გაიგებს. მსურს აქცენტი გავაკეთო ელჩის განცხადებაზეც, რადგან არ მომეწონა ბევრი რამ. ამერიკა არის ჩვენის სტრატეგიული პარტნიორი და ეს კაცი აფასებს თავისი გადმოსახედიდან, ეს რომ ამერიკაში მოხდეს ალბათ ქუჩები გაივსება ხალხით, ეს აბსოლუტურად მისაღებია. შფოთავს იან კელი, რომ რამე ისეთი არ მოხდეს, რაც ცუდ ეფექტს მიანიჭებს არჩევნებს. ქუჩები ხალხით აქ ვერ გაივსება, იმიტომ რომ სხვანაირი წარმოდგენა აქვთ ამ ტელევიზიასთან. ვინც გამოსულა, გამოვა ისევ, მაგრამ გარეთ ძალიან ცუდ შედეგს მივიღებთ. აქ მე შეფასებას ვუკეთებ ნაციონალური მოძრაობის ხელწერას, რომ მათ მოახერხეს 9 წლის განმავლობაში, ეს სიცრუის მანქანა მაგრად ამუშავეს, განსაკუთრებით გარეთ, გარეთ მოტყუება უფრო იოლია. ჩვენ ვხედავდით ხალხს აწამებდნენ, ხოცავდნენ და შიმშილით კლავდნენ, რამდენიც არ უნდა ეხატა სააკაშვილს ვირტუალური სამყარო ტელევიზიებს, ამას ხალხი მაინც ხედავდა, მაგრამ გარეთ გაცილებით უფრო დავაზიანეთ თქვენი ხელწერით ჩვენი დამოკიდებულება გარე სამყაროსადმი,“- განაცხადა ივანიშვილმა.