სასამართლო პროცესზე რუსთავი2-ის ადვოკატებს და გენერალურ დირექტორს არ უშვებენ

პოლიტიკა - 10:30, 07 Jun, 2016

2038

სააპელაციო სასამართლოს მოსამართლეთა კოლეგიამ ტელეკომპანია რუსთავი2-ის ადვოკატებს თამთა მურადაშვილს და დიმიტრი საძაგლიშვილს პროცესზე დასწრების უფლება არ მისცა, მიზეზად დასახელდა ის, რომ დღევანდელ სხდომაზე ქიბარ ხალვაშის მხარემ სარჩელი საავტორო უფლებებთან დაკავშირებით მოხსნა. პროცესზე დასწრების საშუალებას არ მისცეს არც ტელეკომპანიის გენერალურ დირექტორს ნიკა გვარამიას.

„რუსთავი2“-ის ადვოკატის თამთა მურადაშვილის განცხადებით ქიბარ ხალვაშის ადვოკატმა პაატა სალიას, ამ საკითხის ბოლო მომენტში მოხსნა დაგეგმილი ქონდა. მურადაშვილის თქმით სასამართლომ დღევანდელი ქმედებით თავისი არასამართლიანი სახე კიდევ ერთხელ აჩვენა, რადგან სასამართლო პროცესზე რუსთავი2 დაცვის გარეშე დატოვა.

„პირველ რიგში უნდა დავიწყოთ იმ ისტორიის გახსენება, თუ როგორ მოხდა საავტორო უფლებებზე სარჩელის წარდგენა. როგორც ქიბარ ხალვაშმა განაცხადა ის 10 წელი ემზადებოდა ლოგოს და გადაცემების უფლებების დასაბრუნებლად. ბოლო დღემდე იცავდნენ და აპელირებდნენ , რომ მათ უნდოდათ საავტორო უფლებების დაცვა. ყველამ იცოდა, რომ დღეს დასრულდებოდა პროცესი და სულ ბოლო წამში პაატა სალია უარს ამბობს სააპელაციო საჩივარზე. ეს ნათელი დასტური იმისა, რომ პაატა სალიამ ფაქტობრივად მწვანე ხალიჩა დაუგო მოსამართლეებს იმისათვის, რომ მათ ჰქონოდათ ბრჭყალებში სამართლებრივი საფუძველი , რომ არ დაეშვათ პროცესზე ნიკა გვარამია და ასევე ჩვენ ადვოკატები. ნიკა გვარამია დარბაზში როგორც დამსწრე რომ დაესწროს ამის უფლებაც არ აქვს მას. შესაბამისად ნათელი ხდება რა გზით მიდის სასამართლო “-განაცხადა თამთა მურადაშვილმა.