„ქართული ოცნების“ ყოფილმა წევრმა თამაზ მეჭიაურმა ახალი პარტია შექმნა სახელწოდებით - „თამაზ მეჭიაური ერთიანი საქართველოსთვის“. პარტიის სახეები იქნებიან ჯემალ სეფიაშვილი, სანდრო ბრეგაძე, დავით ფაცაცია, ლალი მოროშკინა, ია მეტრეველი.

„ნიუპოსტი“ სამომავლო გეგმებზე სასაუბროდ კომპოზიტორ და მომღერალ ჯემალ სეფიაშვილს დაუკავშირდა, რომელმაც პოლიტიკური ფიგურის სტატუსის მორგების შემდეგ სატელეფონო კომენტარი არ იკადრა, ჟურნალისტს კი „ჟურნალისტის სახელმძღვანელოს“ გადაფურცვლისკენ მოუწოდა.

- ინტერვიუს ტელეფონით არ ვიძლევი...

- ინტერვიუ არ მინდა ბატონო ჯემალ, მცირე კომენტარიც საკმარისია!

- გახსენით ჟურნალისტის სახელმძღვანელო და წაიკითხეთ, რომ კომენტარებს ტელეფონით არ იძლევიან...

- ბატონო ჯემალ, „ჟურნალისტის სახელმძღვანელო“ გადამღერებული მაქვს და თქვენზე გაცილებით მაღალი და მნიშვნელოვანი თანამდებობის პირები იძლევიან კომენტარებს ტელეფონით, წარმატებას გისურვებთ წამოწყებულ საქმეში...

საქმე ის არის, რომ დამწყები პოლიტიკოსის კარიერულ წინსვლაში მეოთხე ხელისუფლება ძალიან დიდ როლს ასრულებს, იმ შემთხვევაში თუ ამ ხელისუფლების წინააღმდეგ „საპროტესტო აქციას“ აწყობს რესპონდენტი, იგი სამწუხაროდ თუ საბედნიეროდ, მუდამ დამწყებად რჩება...