,,ეს უნდა გახდეს ქართული ახალი სახელმწიფოს ქვაკუთხედი“ - სანდრო ბრეგაძე მეჭიაურის პარტიის იდეოლოგიაზე

პოლიტიკა - 14:24, 06 Jun, 2016

1854

„ქართული ოცნების“ ყოფილმა წევრმა თამაზ მეჭიაურმა შექმნა პარტია სახელწოდებით, „თამაზ მეჭიაური ერთიანი საქართველოსთვის“. პარტიის სახეები იქნებიან ჯემალ სეფიაშვილი, სანდრო ბრეგაძე, დავით ფაცაცია, ლალი მოროშკინა, ია მეტრეველი.

მეჭიაურის ახალი პარტიის წევრმა სანდრო ბრეგაძემ „ნიუპოსტთან“ საუბრისას პარტიის იდეოლოგიაზე ისაუბრა. ბრეგაძის განცხადებით, „თამაზ მეჭიაური ერთიანი საქართველოსთვის“ მიზანი არ არის რომელიმე უცხო ქვეყნის ინტერესების გატარება, პარტია დაფუძნებულია ეროვნულ იდეოლოგიაზე:

„ამ პარტიაში არის თანამოაზრეთა ჯგუფი, ძირითადად არიან ის ადამიანები, რომლებმაც 2012 წლის არჩევნების დროს ბატონ ბიძინა ივანიშვილთან ერთად მოიპოვეს გამარჯვება „ნაციონალური მოძრაობის“ რეჟიმზე, ესენი არიან ადამიანები, რომლებიც 9 წლის განმავლობაში უკომპრომისოდ ებრძოდნენ სააკაშვილის რეჟიმს და იბრძოდნენ ქვეყანაში სამართლიანობის განმტკიცებისთვის.

პოლიტიკური ორგანიზაცია ეროვნულ იდეოლოგიაზე არის დამყარებული, რომელიც თავის თავში გულისხმობს არა რომელიმე უცხო ქვეყნის ინტერესების გატარებას, არამედ პირველ რიგში საქართველოს მოსახლეობის იდეოლოგიის გატარებას და ქართულ, ეროვნულ იდეოლოგიაზე დაფუძნებული ძლიერი საქართველოს შექმნას. ჩვენ ვფიქრობთ, რომ ქართული ტრადიციები, ეროვნულობა, ყველაფერი რაც ჩვენმა წინაპრებმა მოიტანეს ჩვენამდე, უნდა გახდეს ქართული ახალი სახელმწიფოს ქვაკუთხედი“, - განაცხადა სანდრო ბრეგაძემ.