საქართველოს ფინანსთა მინისტრი ნოდარ ხადური აუდიტის სამსახურის დასკვნას ეხმაურება. უწყების ხელმძღვანელის განცხადებით, 2015 წელს მინისტრების, მათი მოადგილეებისა და მაღალი თანამდებობის პირების შრომითი ანაზღაურება ჯამში შემცირებულია.

ნოდარ ხადურის განცხადებით, მისმა სამინისტრომ ვალდებულებიდან გამომდინარე აუდიტის სამსახურსა და პარლამენტში აღნიშნულ საკითხზე ყველა ის დოკუმენტი გადაგზავნა რომელიც აუცილებელი იყო.

„არაერთხელ მითქვამს და დღესაც ვიმეორებ, რომ მინისტრების, მათი მოადგილეების და მაღალი თანამდებობის პირების შრომის ანაზღაურება ჯამში შემცირებულია. მათ შორის მნიშვნელოვნადაა შემცირებული საქართველოს ფინანსთა სამინისტროში. რაც შეეხება ზოგადად საკითხს, ნამდვილად ასეა, გაზრდილია შრომის ანაზღაურების ფონდი, ეს არის შსს-ს, თავდაცვის სამინისტროს თანამშრომლების ხელფასების გამო და ამაზე ფინანსთა სამინისტრომ გააკეთა განცხადება, მათ შორის იმ პერიოდში, როცა ჩვენ ბიუჯეტი გაგვქონდა საქართველოს პარლამენტში გასული წლის ბოლოს”, - განაცხადა ნოდარ ხადურმა.

სახელმწიფო აუდიტის სამსახურის 2015 წლის საქმიანობის ანგარიშის თანახმად, 2015 წელს წინა წელთან შედარებით, პრემიის სახით გაცემული თანხების შემცირების პარალელურად, მნიშვნელოვნად გაიზარდა დანამატის სახით გაცემული რესურსის მოცულობა და საერთო ჯამში, 2015 წელს „პრემიისა“ და „დანამატის“ მუხლებით გაცემული თანხების ოდენობამ (14 133 000 ლარით) 2014 წლის ანალოგიურ მაჩვენებელს 4.9%-ით გადააჭარბა.