პროპორციული და მაჟორიტარული სისტემა ისე უნდა დავაჯამოთ, რომ პროპორციული შედეგი მივიღოთ

პროპორციული და მაჟორიტარული სისტემა ისე უნდა დავაჯამოთ, რომ პროპორციული შედეგი მივიღოთ - მენაბდე

პოლიტიკა - 11:16, 06 Jun, 2016

1623

საკონსტიტუციო სასამართლოს პლენუმმა არსებითად განსახილველად მიიღო საპარლამენტო უმცირესობის სარჩელი, რომელიც მაჟორიტარული ოლქების არსებული განაწილების კონსტიტუციასთან წინააღმდეგობის დადგენას მოითხოვს.

იურისტთა ჯგუფი ერთმანდატიანი ოლქების გაუქმებას ითხოვს.

როგორც "ნიუპოსტს"ვახუშტი მენაბდემ განუცხადა, ერთმანდატიანი მაჟორიტარული ოლქების არსებობა არაკონსტიტუციურია.

"ერთმანდატიანი ოლქების არსებობის შემთხვევაში, გამოდის, რომ ტყუილად ვაძლევთ ხმას. ხდება ჩვენი ხმების არაეფექტური ასახვა ეს კი უნდა გამოსწორდეს საკონსტიტუციო სასამართლოს გადაწყვეტილებით" - აღნიშნა მენაბდემ.

იურისტი ოპოზიციის მიერ შემუშავებულ ე.წ. გერმანულ მოდელს უჭერს მხარს.

მენაბდემ განმარტა, რომ ამ მოდელის მიხედვით, საარჩევნო ზღურბლგადალახული პარტიის მიერ მიღებული მანდატების რაოდენობა ტოლია პარლამენტის წევრთა საერთო რაოდენობის იმდენი პროცენტის, ხმების რამდენი პროცენტიც მიიღო მისმა პარტიულმა სიამ.

მისი თქმით, არაკონსტიტუციური სწორედ 77 მანდატიდან დათვლაა და არა 150- დან.

“77-დან რომ ითვლება და არა 150-დან, ესაა კონსტიტუციის საწინააღმდეგო. მოქმედი დათვლის წესით ამომრჩეველთა განწყობა პროპორციულად არ აისახება მანდატებში. მოგეხსენებათ, კონსტიტუცია დგას პროპორციულობის, თანასწორობის პრინციპზე, შესაბამისად პროპორციული და მაჟორიტარული საარჩევნო სისტემა ისე უნდა დავაჯამოთ, რომ მაქსიმალურად პროპორციული შედეგი მივიღოთ”- ამბობს მენაბდე.