Die Welt-ში გამოქვეყნებულ სტატიაში იმ მიზეზებზეა საუბარი, რის გამოც გერმანია საქართველოსთვის, უკრაინისა და კოსოვოსთვის ვიზალიბერალიზაციის დაწესების წინააღმდეგ გამოდის. ერთერთ მთავარ მიზეზად კრიმინოგენულ;ი ვიტარების გაუარესება სახელდება სტატიაში ნათქვამია, გერმანიის შინაგან საქმეთა მინისტრმა ტომას დე მეზიერმა, პარლამენტში გამართულ დახურულ სხდომაზე განაცხადა, რომ გერმანიაში აქტიურობენ ქართული კრიმინალური ჯგუფები, რომლებიც ძირითადად, ბინების ძარცვით არიან დაკავებული.

Die Welt-ის თანახმად, სწორედ ამიტომ გერმანია და საფრანგეთი მუშაობენ ე.წ. შეჩერების მექანიზმზე, რომელიც საჭიროების შემთხვევაში უვიზო რეჟიმის შეჩერებას გულისხმობს.

გამოცემის თანახმად, ევროკავშირის იუსტიციისა და შინაგან საქმეთა მინისტრები არ დათანხმდებიან საქართველოსთვის, უკრაინისთვის, კოსოვოსა და თურქეთისთვის უვიზო რეჟიმის დაწესებას, სანამ ე.წ. შეჩერების მექანიზმი ძალაში არ შევა. გარდა ამისა, გერმანიას სურს, რომ თითოეული ქვეყნისთვის უვიზო რეჟიმი ეტაპობრივად დაწესდეს.

უვიზო რეჟიმის დაწესების წინააღმდეგია გერმანიის ფინანსთა ყოფილი მინისტრი, ბუნდესტაგის საგარეო საქმეთა კომიტეტის წევრი, პერ შტაინბრიუკი, რომელიც აცხადებს, რომ სანამ ევროზონაში პრობლემები არ მოგვარდება და ევროპა მიგრაციულ კრიზისს თავს არ დააღწევს, უნდა დაწესდეს მორატორიუმი ევროზონაში გაწევრიანებზე, ევროკავშირის გაფართოებაზე და ნატო-ში ახალი ქვეყნების მიღებაზე.