"საქართველო უვიზო რეჟიმს მიიღებს და მაქვს იმედი, ეს უფრო ადრე მოხდება, ვიდრე გვიან"

"საქართველო უვიზო რეჟიმს მიიღებს და მაქვს იმედი, ეს უფრო ადრე მოხდება, ვიდრე გვიან" - ლატვიის ელჩი

პოლიტიკა - 21:07, 04 Jun, 2016

3153

როდის ამოქმედდება საქართველოსთვის ევროკავშირთან უვიზო რეჟიმი, რატომ ვერ შეთანხმდნენ ბრიუსელში ევროკავშირის ქვეყნების მუდმივ წარმომადგენელთა კომიტეტის წევრები და რა არის პროცესის შემაფერხებელი ფაქტორები. "მოამბემ" ექსკლუზიური ინტერვიუ მოიპოვა და შეხვედრის ერთ-ერთ მონაწილეს, ლატვიის ელჩს ესაუბრა.

სანიტა პავლუტა-დესლანდესის თქმით, ვიზალიბერალიზაციის საკითხზე შეუთანხმებლობის , მთავარი და ერთადერთი ფაქტორი მიგრანტთა კრიზისია.

"ძალიან რთული დებატებია, ევროკავშირში ქვეყნისთვის უვიზო მიმოსვლის მინიჭებაზე, მინდა იცოდეთ, რომ არა საქართველოს გამო. რადგან არის ზოგადი შეთანხმება ორგანიზაციაში, რაზეც საწინააღმდეგო აზრი არავის აქვს, რომ საქართველომ ყველა მოთხოვნა დააკმაყოფილა. ამა ემატება კომისიის მიერ მომზადებული პოზიტიური ანგარიში, რომელიც პირველი ნაბიჯი იყო. საქმე ის გახლავთ, რომ მსჯელობის თემა, ანუ უვიზო რეჟიმი ძალიან მგრძნობიარე თემაა ევროკავშირის ზოგიერთი ქვეყნაში - მიზეზი საზოგადოებრივი აზრია. მოსახლეობა შეშფოთებულია იმ კითხვებით რაც უკავშირდება მიგრაციის პრობლემებს. მესამე ქვეყნების ნაკადს ევროკავშირის საზღვრებში. ასე რომ, ორგანიზაციის რიგ წევრებს აქვთ სირთულეები საკუთარ ქვეყნებში საზოგადოებრივ აზრთან. რამდენიმე წევრ სახელმწიფოში არჩევნებიც მოდის და ეს საკითხი კიდევ უფრო მგრძნობიარე ხდება. დარწმუნებული ვარ რომ საქართველო უვიზო რეჟიმს მიიღებს და მაქვს დიდი იმედი, რომ ეს უფრო მოხდება ვიდრე გვიან, მაგრამ უნდა გვესმოდეს რომ ყველა წევრი ქვეყანა უნდა იყოს თანახმა, ამას დრო სჭირდება"- აღნიშნა დიპლომატმა.

ლატვიის ელჩს უჭირს ღიად ისაუბროს იმ წევრებზე, რომლებიც წინააღმდეგნი არიან რომ საქართველოსთვის სასურველი შედეგი დღეს დადგეს და მათ დიდ ქვეყნებს უწოდებს.

"ევროკავშირის წევრი ქვეყანა ადგენს დღის წესრიგს. მსჯელობისას სხვა ქვეყნების კონტექსტსაც ვითვალისწინებთ, თუმცა ყველა ერთხმად ვაღიარებთ, რომ საქართველო სიაში არის ერთადერთი კანდიდატი რომელმაც ყველა მოთხოვნა დააკმაყოფილა"- აღნიშნა მან.