რუსეთი და ოკუპირებული ცხინვალი: საქართველოს ნატო-სთან დაახლოება გეოპოლიტიკურ რისკს ზრდის

პოლიტიკა - 19:57, 04 Jun, 2016

5382

ჟენევის დისკუსიის მონაწილე რუსეთისა და ოკუპირებული ცხინვალის დეფაქტო ხელისუფლების წარმომადგენლები საქართველოსა და დასავლელი პარტნიორების სამხედრო თანამშრომლობას სახიფათოს უწოდებენ.

,,თბილისის აჩქარებული კურსი, დაუახლოვდეს ნატო-ს, დესტაბილიზაციით ემუქრება არა მხოლოდ სამხრეთ კავკასიას, არამედ გეოპოლიტიკურ რისკებს ზრდის“ - მიიჩნევენ რუსეთისა და ოკუპირებული ცხინვალის წარმომადგენლები.

ამის შესახებ საინფორმაციო სააგენტო „სპუტნიკ-ოსეთია“ იტყობინება.

ცხინვალში დე ფაქტო პრეზიდენტის ლეონიდ თიბილოვის წარმომადგენლისა და რუსეთის საგარეო საქმეთა სამინისტროს დელეგაციის ჟენევის დისკუსიის წევრებს შორის შეხვედრა გაიმართა. შეხვედრის მონაწილეებმა ჟენევის მოლაპარაკებების მომავალ რაუნდამდე კონსულტაციები გამართეს.

„ცხინვალის განსაკუთრებული შეშფოთება ნატო-ს წევრი ქვეყნების შეიარაღებული ძალებისა და მძიმე საბრძოლო ტექნიკის გამოყენებით საქართველოს ტერიტორიაზე წვრთნებმა გამოიწვია. საქართველოსა და მისი მოკავშირეების საშიში ქმედებისკენ აუცილებლად მივაპყრობთ ჟენევის მოლაპარაკებებში მონაწილე მხარეების ყურადღებას“, - ნათქვამია განცხადებაში.

ჟენევის მოლაპარაკებების მომდევნო რაუნდი 14-15 ივნისს გაიმართება.