მნიშვნელოვანია, რომ ქართველი ხალხი არ დაისაჯოს ხელისუფლების შეცდომების გამო

მნიშვნელოვანია, რომ ქართველი ხალხი არ დაისაჯოს ხელისუფლების შეცდომების გამო - ხოშტარია ვიზალიბერალიზაციაზე

პოლიტიკა - 18:05, 04 Jun, 2016

2608

ნაციონალური მოძრაობის წევრი ელენე ხოშტარია იმედოვნებს, რომ ხელისუფლების შეცდომებს გამო მოსახლეობა არ დაზარალდება და ქვეყანა უვიზო მიმოსვლას მიიღებს.

„სამწუხაროა რომ ხელისუფლებამ ინტენსიურად არ იმუშავა ამ ქვეყნებთან და ზოგადად იმ არასტაბილური ვითარებით კრიმინოგენული ცუდი სიტუაციით და ძალადობრივი ფონით, ბუნებრივია, ჩვენ ხელს არ ვუწყობთ ამ ქვეყნების შინაგან საქმეთა მინისტრების დარწმუნებას. ამ მხრივ ეს საფრთხეა მთლიანად ამ პროცესისათვის. თუმცა დიდი იმედი მაქვს, რომ მოხდება ამ პროცესის ისევ დაძვრა და მნიშვნელოვანია, რომ ქართველი ხალხი, საქართველო, არ დაზარალდეს და არ დაისაჯოს ხელისუფლების შეცდომების გამო და ეს ისტორიული მომენტი არ გავუშვათ ხელიდან,“ - განაცხადა ელენე ხოშტარიამ.

მთავრობაში აცხადებენ, რომ საკითხის გადაწევა შიდა პოლიტიკას არ უკავშირდება და შემაფერხებელი ფაქტორი ევროკავშირის წევრი ქვეყნებისთვის მიგრაციის პრობლემებია.

„საუბარია იმაზე, რომ ახლა არ იყოს გადაწყვეტილება და სექტემბერში გადაიწიოს, რაც შეეხება შიდა პოლიტიკურ მოვლენებს, ამას არანაირი კავშირი არა აქვს ვიზალიბერალიზაციასთან. იქ არის ევროპული ქვეყნების პრობლემები რაც მიგრაციასთან დაკავშირებით არსებობს. საქართველომ ყველაფერი გააკეთა იმისთვის, რომ საქართველოს მოქალაქეებს ჰქონდეთ შესაძლებლობა ვიზების გარეშე იმოგზაურონ ევროპულ ქვეყნებში,“ - განაცხადა კახა კალაძემ.

ევროპული საბჭო საქართველოს უვიზო მიმოსვლის პერსპექტივებზე, სავარაუდოდ, მომავალ კვირას იმსჯელებს. წინასწარი ინფორმაციით, შეხვედრა მუდმივი წარმომადგენლების დონეზე გაიმართება.