ბიძინა ივანიშვილის პირობები რუსთავი 2-ს და ტაბულას - ექსპრემიერის წერილი ტელეკომპანიებს

პოლიტიკა - 15:12, 04 Jun, 2016

6852

ბიძინა ივანიშვილი, ტელეკომპანიებს ”რუსთავი 2”-სა და ”ტაბულას”, პირდაპირ ეთერში მონაწილეობისთვის კონკრეტულ პირობებს უყენებს. ივანიშვილის შეთავაზებას ”რუსთავი 2”-ის გენერალური დირექტორი ნიკა გვარამია ავრცელებს.

,,რაკიღა ბატონმა ივანიშვილმა საჯარო კომუნიკაციის გზა აირჩია და საჯარო ინტერესიც მაღალია, ვაქვეყნებ მის შემოთავაზებას ჩვენი მისამართით. რუსთავი 2ის პასუხს გამოვაქვეყნებთ დღის განმავლობაში. მანამდე, საინტერესო იქნებოდა ჩვენი მაყურებლის დამოკიდებულება, ასახული კორექტულ კომენტარებში. წინასწარ გიხდით მადლობას.

ბიძინა ივანიშვილის შეთავაზება "რუსთავი 2"-ს და "ტაბულას"
დრო:
მომავალი კვირის ოთხშაბათი
ადგილი:
ნეიტრალური სივრცე (სასტუმრო, სხვა...) ქირის შემთხვევაში მზად ვართ ჩვენზე ავიღოთ სივრცის დაქირავების ხარჯები.
მონაწილეები:
2-3 ჟურნალისტი თითო არხიდან, ბიძინა ივანიშვილი და მოდერატორი
ეთერი:
პირდაპირი
ფორმატი:
ჟურნალისტები რიგრიგობით სვამენ კითხვებს, რესპოდენტი პასუხობს, კითხვების თანმიმდევრობას და რეგლამენტს უზრუნველყოფს მოდერატორი
თემები:
შეხვედრის ერთი ნაწილი დაეთმობა "რუსთავი 2"-ის და "ტაბულას" გადაცემებში საზოგადოებისთვის მიწოდებული იმ ინფორმაციების განხილვას რომლებიც შეეხებოდა ივანიშვილის პერსონას და ხდებოდა სიცრუის ტირაჟირება.
მეორე ნაწილი დაეთმობა ივანიშვილის წერილში გაჟღერებული თემების განხილვას.
ბოლოს, არხებს ექნებათ საშუალება დასვან სხვა, მათთვის საინტერესო კითხვები" - წერს ნიკა გვარამია.