საქართველოს პრემიერ-მინისტრმა ირაკლი კვირიკაშვილმა განათლებისა და მეცნიერების მინისტრი, თამარ სანიკიძე დღეს თანამდებობიდან გაათავისუფლა, თუმცა, აღნიშნა, რომ სანიკიძე მათ გუნდთან ერთად მუშაობას განაგრძობს. ჟურნალისტებთან აღნიშნულ თემაზე კომენტარი თავად თამარ სანიკიძემაც გააკეთა, თუმცა, იგი ჯერჯერობით არ საუბრობს თუ სად გააგრძელებს მოღვაწეობას. თამარ სანიკიძე ამბობს, რომ მნიშვნელოვანია გონივრული თვალით იქნეს დანახული ის, რაც 4 წლის განმალობაში განათლების სისტემაში გაკეთდა.

,,ვფიქრობ ეს იყო გონივრული გადაწყვეტილება. ძალიან უპრიანია, სწორედ ახლა, რომ დამოუკიდებელი თვალით იქნეს დანახული ის ქმედებები შეფასებული, რომელსაც ადგილი ჰქონდა ამ სამი ოთხი წლის განმავლობაში და ძალიან მნიშვნელოვანი ეტაპი არის იმისათვის, რომ სწორედ განისაზღვროს სისტემის განვითარების ძირითადი სტრატეგიული მიმართულებები. ვფიქრობ ეს იყო გონივრული გადაწყვეტილება“ - განაცხადა სანიკიძემ.

„ძალიან ბევრი მიმდინარე საკითხია, რომელიც ეხება ახალ სასწავლო წელს, ასევე ამ პერიოდში მიმდინარეობს შესყიდვები, პირველ რიგში, ამაში ჩაერთვება ახალი მინისტრი, გადავაბარებთ ყველაფერს საფუძვლიანად, რომ საერთო საქმე არ დაზიანდეს. დარწმუნებული ვარ, არავითარი ხარვეზი ამ მიმართულებებით არ გვექნება. გადაბარების პროცესს დავასრულებთ და მექნება უფრო მეტი ინფორმაცია ჩემს სამომავლო საქმიანობასთან დაკავშირებით“, – განაცხადა სანიკიძემ.