საპარლამენტო უმრავლესობის წევრი მანანა კობახიძე ტელეკომპანია „რუსთავი 2“-ის მოსამართლის, ნათია გუჯაბიძის შესაძლო თაღლითობაზე კომენტარს აკეთებს და მიიჩნევს, რომ ეს ფაქტი შესაძლოა „დედაშვილობის პრობლემად შეფასდეს“:

„სისხლის სამართლის დანაშაულს და თაღლითობას, როგორც იყო გაცხადებული ნამდვილად ადგილი არ აქვს, ხელშეკრულების დადებას შესაძლოა ერთი მორალური მხარე ჰქონდეს და შესაძლოა დედაშვილობის პრობლემად განიხილო, მაგრამ სამართლებრივად ამ ხელშეკრულების დადებას არავითარი კანონის მიღმა ფარგლები არ აქვს. არც დისციპლინური დევნის საფუძველია და არც მითუმეტეს მოსამართლის აცილების. ესეც სასამართლოს შესაფასებელია“, - აცხადებს მანანა კობახიძე.

შეგახსენებთ, რომ ტელეკომპანია რუსთავი 2-ის გენერალურმა დირექტორმა ნიკა გვარამიამ, ორი დღის წინ გამართულ საგანგებო ბრიფინგზე მოსამართლე ნათია გუჯაბიძეზე ინფორმაცია გაავრცელა, რომლის თანახმადაც ეს უკანასკნელი თაღლითობაში იყო შემჩნეული. მას კი იუსტიციის უმაღლესი საბჭო ხელს აფარებდა და ტელეკომპანიის სასამართლო პროცესის ხელისუფლებისთვის საჭირო მიმართულებით წარსამართად გუჯაბიძეზე ზეწოლისთვის იყენებდა.

აღნიშნულ საკითხზე გუშინ კომენტარი გააკეთა საქართველოს მთავარმა პროკურორმა, ირაკლი შოთაძემ, რომელმაც აღნიშნა, რომ საქართველოს პროკურატურაში მოსამართლე ნათია გუჯაბიძის საქმეზე არავითარი ინფორმაცია არ შესულა.

საკითხს გამოეხმაურა იუსტიციის უმაღლესი საბჭოც, რომელმაც გუშინ განცხადება გაავრცელა, სადაც აღნიშნულ ფაქტს „უსაფუძვლო ბრალდება“ უწოდა.

საქართველოს ენერგეტიკის მინისტრი, ვიცე-პრემიერი კახი კალაძე არ გამორიცხავს, რომ მოსამართლე ნათია გუჯაბიძის მისამართით გამოთქმული ბრალდებები არ შეესაბამებოდეს სიმართლეს, მისი თქმით მას აღნიშნულ საკითხზე ინფორმაცია არ აქვს.

საპასუხოდ ნიკა გვარამიამ ნათია გუჯაბიძის საქმეზე გუშინ ახალი გარემოება გახადა ცნობილი.