საქართველოს ენერგეტიკის მინისტრი, ვიცე-პრემიერი კახი კალაძე არ გამორიცხავს, რომ მოსამართლე ნათია გუჯაბიძის მისამართით გამოთქმული ბრალდებები არ შეესაბამებოდეს სიმართლეს, მისი თქმით მას აღნიშნულ საკითხზე ინფორმაცია არ აქვს.

„მე ამასთან დაკავშირებით არანაირი ინფორმაცია არ მაქვს, ეს შეიძლება იყოს ძალიან დიდი სიცრუე, როგორც ხდება ხოლმე რუსთავი 2-ის ეთერიდან სიცრუის პროპაგანდა. ეს არ არის რაღაც სიახლე. წლების განმავლობაში ასე ხდებოდა და სამწუხაროდ დღესაც ასე ხდება. რაც შეეხება პროცესს, რომელიც მიდის რუსთავი 2-თან, ჩვენ უნდა დაველოდოთ, წინასწარ რაიმე კომენტარების გაკეთება ვფიქრობ იქნებოდა არასწორი“, - აცხადებს კალაძე.

შეგახსენებთ, რომ ტელეკომპანია რუსთავი 2-ის გენერალურმა დირექტორმა ნიკა გვარამიამ, ორი დღის წინ გამართულ საგანგებო ბრიფინგზე მოსამართლე ნათია გუჯაბიძეზე ინფორმაცია გაავრცელა, რომლის თანახმადაც ეს უკანასკნელი თაღლითობაში იყო შემჩნეული. მას კი იუსტიციის უმაღლესი საბჭო ხელს აფარებდა და ტელეკომპანიის სასამართლო პროცესის ხელისუფლებისთვის საჭირო მიმართულებით წარსამართად გუჯაბიძეზე ზეწოლისთვის იყენებდა.

აღნიშნულ საკითხზე გუშინ კომენტარი გააკეთა საქართველოს მთავარმა პროკურორმა, ირაკლი შოთაძემ, რომელმაც აღნიშნა, რომ საქართველოს პროკურატურაში მოსამართლე ნათია გუჯაბიძის საქმეზე არავითარი ინფორმაცია არ შესულა.

საკითხს გამოეხმაურა იუსტიციის უმაღლესი საბჭოც, რომელმაც გუშინ განცხადება გაავრცელა, სადაც აღნიშნულ ფაქტს „უსაფუძვლო ბრალდება“ უწოდა.

საპასუხოდ ნიკა გვარამიამ ნათია გუჯაბიძის საქმეზე გუშინ ახალი გარემოება გახადა ცნობილი.