რუსთავი 2-ის საქმე და აშშ-ს ელჩის განცხადება - ,,ეს იყო ჩვენი სტრატეგიული პარტნიორის პირადპირი მესიჯი ხელისუფლებას“

პოლიტიკა - 16:59, 02 Jun, 2016

2408

საქართველოს თავდაცვის ყოფილი მინისტრი დიმიტრი შაშკინი აშშ-ს ელჩის, იან კელის განცხადებას აფასებს, რომელიც დიპლომატმა „რუსთავი 2“-ს საქმესთან დაკავშირებით გააკეთა.

„ნიუპოსტთან“ საუბრისას დიმიტრი შაშკინი აღნიშნავს, რომ კელის განცხადება საქართველოს სტრატეგიული პარტნიორის მხრიდან მნიშვნელოვანი გზავნილია, რაც დიდ წვლილს შეიტანს „რუსთავი 2“-ის დამოუკიდებლობის შენარჩუნებაში:

„ამერიკის ელჩის განცხადება იყო ძალიან მნიშვნელოვანი და ძალიან დროული. სასამართლოში განვიათარებულმა პროცესებმა, ყველას დაანახა, რომ ხელისუფლებამ პოლიტიკური გადაწყვეტილება მიიღო და სასამართლო, როგორც ნოტარიუსი ამ პოლიტიკურ განცხადებას ახლა აფორმებს. ელჩის ეს განცხადება არის ცივი შხაპი ყველა იმ ადამიანისთვის, რომელიც ახლა ხელისუფლებაშია, და რომელსაც ეგონა, რომ ჩვენი სტრატეგიული პარტნიორი ამაზე თვალებს დახუჭავს.

ჩვენი სტრატეგიული პარტნიორის ელჩმა მიუთითა პირდაპირ, ღია ტექსტით, ზედმეტი თამაშის გარეშე, რომ თავისუფალი მედიის, განსაკუთრებით წინასაარჩევნო პერიოდში, მესაკუთრის და მენეჯმენტის შეცვლა არის სრულიად დაუშვებელი და ქართველ ხალხს აქვს უფლება, რომ ამ არაკონსტიტუციურ, არაკანონიერ, არადემოკრატიულ გადაწყვეტილებას დაუდგეს წინ.

ეს განცხადება იყო ძალიან დროული და სტრატეგიული პარტნიორისგან იყო პირდაპირი თხოვნა, მესიჯი, რომ ასეთი არადემოკრატიული ნაბიჯი საქართველოს მთავრობამ არ უნდა გადადგას. ჩემი აზრით ეს განცხადება დიდი წვლილს შეიტანს იმ საკითხში, რომ რუსთავი 2 ქართველი ხალხის დახმარებით და მხარდაჭერით დარჩეს დამოუკიდებელი“, - განაცხადა დიმიტრი შაშკინმა „ნიუპოსტთან“ საუბრისას.

შეგახსენებთ, რომ იან კელის თქმით საარჩევნო წელს ტელევიზიის მენეჯმენტის შეცვლა პრობლემების გამომწვევი იქნებოდა აშშ-იც, ამიტომ იან კელის თქმით საარჩევნო წელს მსგავსი გართულებების მიმართ საზოგადოება არ უნდა იყოს ტოლერანტული.