ევროკავშირი საქართველოს მოქალაქეებისთვის უვიზო მიმოსვლის მინიჭებას აფერხებს

ევროკავშირი საქართველოს მოქალაქეებისთვის უვიზო მიმოსვლის მინიჭებას აფერხებს - Reuters

პოლიტიკა - 09:27, 02 Jun, 2016

6108

ევროკავშირი აფერხებს საქართველოს მოქალაქეებისთვის უვიზო მიმოსვლის მინიჭებას, საემიგრაციო კრიზისთან დაკავშირებული საფრთხეების გამო. ამის შესახებ სააგენტო Reuters საკუთარ დიპლომატიურ წყაროებზე დაყრდნობით წერს.

ევროკავშირის წევრი ქვეყნების მუდმივი წარმომადგენლების კომიტეტმა (COREPER) ბრიუსელში გამართულ სხდომაზე კვლავ ვერ მიიღო გადაწყვეტილება საქართველოსთვის ვიზების ლიბერალიზაციის საკითხზე.

სააგენტოს ცნობით, თურქეთი, კოსოვო და უკრაინა ასევე უნდა ელოდონ ვიზალიბერალიზაციასთან დაკავშირებით გადაწყვეტილების გადადებას, რადგან ევროკავშირი მიგრაციული კრიზისის ფონზე უფრო მეტ სიფრთხილეს ავლენს. მითუმეტეს მაშინ, როდესაც თურქეთის გავლით ევროპაში თითქმის 1.3 მილიონი მიგრანტი გადავიდა.

"როიტერსის" ცნობით, ევროკავშირის მუდმივ წარმომადგენელთა კომიტეტის წევრებმა გუშინ გამართულ შეხვედრაზე საქართველოს ვიზალბერალიაციის საკითხის განხილვა გადადეს. სააგენტოს ცნობით, სავიზო რეჟიმის გაუქმების მოწინააღმდეგე ქვეყნებს შორის არიან საფრანგეთი და გერმანია.

“ჩვენ არ გვსურს მთელი პროცესის შეჩერება. ჩვენ მხოლოდ გვსურს,სიფრთხილე გამოვიჩინოთ” - ციტირებს Reuters-ი ევროკავშირის ერთ-ერთი ქვეყნის დიპლომატს.

როგორც სააგენტო წერს, ევროპელი დიპლომატები საქართველოს ვიზალიბერალიზაციის საკითხის განხილვას მომავალ კვირას დაუბრუნდებიან, ვიდრე უკრაინის საკითხს განიხილავენ, რომლის მდგომარეობაც ამ მხრივ უფრო რთულია.

საქართველოსთვის უვიზო რეჟიმის დაწესების საკითხი 24 მაისსაც იყო დანიშნული ევროკავშირის წევრი ქვეყნების მუდმივი წარმომადგენლების კომიტეტის სხდომის დღის წესრიგში, თუმცა ევროკავშირის ელჩებმა გადაწყვეტილება ვერ მიიღეს.

სავიზო რეჟიმის გასაუქმებლად საჭიროა, რომ შესაბამისი საკანონმდებლო ინიციატივა ევროპარლამენტმა განიხილოს, რომლის ბოლოს სესია ზაფხულს 4-7 ივნისს გაიმართება და სექტემბრამდე აღარ განახლდება.