"FIFA ემიჯნება და არ აღიარებს ამ პროცესს" - ფეხბურთის ფედერაცია ოკუპირებული აფხაზეთის მოთხოვნაზე

პოლიტიკა - 12:51, 01 Jun, 2016

1452

საქართველოს ფეხბურთის ფედერაციის გენერალური მდივანი დავით მუჯირი "ნიუპოსტთან" აცხადებს, რომ FIFA-ს პოზიცია უცვლელია და ის არ აღიარებს ოკუპირებულ აფხაზეთში მიმდინარე კონიფას ჩემპიონატს.

"ეს არის არაღიარებული ქვეყნების ჩემპიონატი, ის ვერანაირად იქნება ვერც FIFA-ს და ვერც UEFA-ს მიერ აღიარებული. ჩვენ აქტიური კომუნიკაცია გვაქვს FIFA-სთან და მათგან გვაქვს მკაფიო დასტური, რომ ისინი ემიჯნებიან ამ ღონისძიებას. რაც შეეხება კონკრეტულ პირებს, რომლებიც FIFA-ში დარეგისტრირებული მატჩების აგენტები არიან, შემიძლია გითხრათ, რომ ისინი არ არიან FIFA-ს ოფიციალური წარმომადგენლები. ასე რომ მათ განცხადებას სერიოზულად ვერ მოვეკიდებით. მივმართეთ FIFA-ს და აღნიშნული პირების განცხადების საპასუხოდ მოვითხოვეთ რეაგირება"- აღნიშნა "ნიუპოსტთან" მუჯირმა.

ოკუპირებულ აფხაზეთში არაღიარებულ ქვეყნებს შორის მსოფლიო საფეხბურთო ჩემპიონატი მიმდინარეობს. გავრცელდა ინფორმაცია, რომ აღნიშნულ ტურნირს FIFA-ს ოფიციალური წარმომადგენლები ესწრებიან.

ოკუპირებული აფხაზეთი FIFA-ს წევრობის სურვილს გამოთქვამს. ამის შესახებ სოხუმში გამართულ პრესკონფერენციაზე FIFA-ს მატჩ-აგენტმა სერგეი აზიზოვმა და შვედმა აგენტმა დაგ ლარსონმა ისაუბრეს.

ლარსონმა დადებითად შეაფასა აფხაზეთში მიმდინარე კონიფას ჩემპიონატი, რომელიც არაღიარებულ ერთეულებს აერთიანებს, თუმცა მას საერთო არაფერი აქვს FIFA-სთან.

სერგეი აზიზოვმა, რომელიც შვედეთში საფეხბურთო სფეროში მოღვაწეობს, განაცხადა, რომ უკვე დაუკავშირდა FIFA-ს აფხაზეთის წევრობის მოთხოვნით.

მისი თქმით, FIFA-ს აგენტები უკვე განიხილავენ აფხაზეთის ნაკრებთან მატჩების ჩატარების საკითხსაც.