საქართველოს ენერგეტიკის მინისტრი, ვიცე-პრემიერი კახა კალაძე, დღეს ყოფილი პრემიერ-მინისტრის ბიძინა ივანიშვილის მიერ გამოქვეყნებულ წერილს დადებითად აფასებს. კალაძე მიიჩნევს, რომ წერილში ავტორი შეეხო ყველა აქტუალურ თემას. იგი ასევე აღნიშნავს, რომ მიესალმება ბიძინა ივანიშვილის გადაწყვეტილებას, მონაწილეობა მიიღოს ოქტომბრის საპარლამენტო არჩევნების წინასაარჩევნო კამპანიაში:

„წერილში ყველაფერი იყო მოცული, ძალიან დეტალურად იყო ასახული ყველაფერი იმ წლებზე საიდანაც დავიწყეთ თუ რა მდგომარეობა იყო ქვეყანაში. იყო საუბარი აწმყოზე და საუბარი მომავალზე თუ რა იგეგმება, რა უნდა გაკეთდეს იმისთვის რომ, ქვეყანაში კეთილდღეობა იგრძნოს საქართველოს თითოეულმა მოქალაქემ.

მე მივესალმები ბატონი ბიძინა ივანიშვილის გადაწყვეტილებას, რომ ის ჩაერთვება საარჩევნო პროცესში. ამასთან დაკავშირებით რამდენიმეჯერ გაკეთდა განცხადება, რომ ის აქტიურად მიიღებდა მონაწილეობას საარჩევნო პროცესში. ეს არ ნიშნავს იმას, რომ ის ბრუნდება პოლიტიკაში, ამასთან დაკავშირებით ხშირად იყო მანიპულაცია, ეს ასე არ არის. მე ძალიან კარგად ვიცნობ ბატონ ბიძინას. ის დიდ პასუხისმგებლობას გრძნობს ჩვენი ქვეყნის, ჩვენი ხალხის წინაშე და მისი ჩართულობა რა თქმა უნდა გარკვეულწილად ხელს შეუწყობს პარტია „ქართული ოცნების“ გამარჯვებას საპარლამენტო არჩევნებში, რომელიც ოქტომბერში გაიმართება.

მე ვფიქრობ, რომ ჩვენი ქვეყნის თითოეულმა მოქალაქემ ყველაფერი უნდა გავაკეთოთ იმისათვის, რომ ხელი შევუწყოთ ქვეყანაში დემოკრატიის განვითარებას, დემოკრატიული ინსტიტუტების განვითარებას, არ აქვს მნიშვნელობა, თუ ვინ რომელი პოლიტიკური პატიის წარმომადგენელია, მე დარწმუნებული ვარ, ყველას ერთნაირად გვიყვარს ჩვენი ქვეყანა და თითოეულმა ჩვენთაგანმა ჩვენი პატარა წვლილი უნდა შევიტანოთ ჩვენი ქვეყნის განვითარებაში“, - განაცხადა კახა კალაძემ ტელეკომპანია „იმედის“ პირდაპირ ეთერში.