"ივანიშვილი არ იქნება იმხელა ეფექტის მატარებელი, როგორც 2012 წელს იყო"- მეჭიაური

პოლიტიკა - 16:49, 30 May, 2016

2695

საქართველოს ექსპრემიერის ბიძინა ივანიშვილის მიერ გამოქვეყნებულ ღია წერილს, მისი მეგობარი და თანაგუნდელი დეპუტატი ტამაზ მეჭიაური გამოეხმაურა. მეჭიაური დადებითად აფასებს ივანიშვილის განცხადებას წინასაარჩევნო კამპანიაში ჩართვასთან დაკავშირებით და აღნიშნავს, რომ ივანიშვილის ჩართულობა ”ოცნებას” გარკვეულწილად გააძლიერებს.

"ბიძინას ჩართულობა გარკვეულწილად გააძლიერებს ”ოცნებას”, მაგრამ ის არ იქნება იმხელა ეფექტის მატარებელი, როგორც 2012 წელს იყო"- აღნიშნა მეჭიაურმა.

მეჭიაური მედიისა და სასამართლო ხელისუფლების ნაწილში ექს-პრემიერს ეთანხმება და მიიჩნევს, რომ მედია ზომაზე მეტად თავისუფალია, რაც შეეხება სასამართლო ხელისუფლებას, დეპუტატის თქმით, სისტემა ხელისუფლების ჩარევისგან თავისუფალია, მაგრამ არ არის თავისუფალი ყოფილი ხელისუფლების წარმომადგენლების მხრიდან ზეწოლის განხორციელებისგან.თუმცა მეჭიაური საგარეო კურსთან დაკავშირებით ივანიშვილის მოსაზრებას არ ეთანხმება და აცხადებს, რომ ვერ ხედავს იმ ოპტიმიზმის საფუძველს, რა ოპტიმიზმითაც ივანიშვილი საქართველოს დასავლურ ინტეგრაციას უყურებს:

„სურვილის მიუხედავად ვერ ვეთანხმები ბიძინა ივანიშვილის მოსაზრებას საგარეო კურსთან დაკავშირებით. კიდევ უფრო მკვეთრად გამოხატავს თავის მხარდაჭერას ევროატლანტიკური კურსისადმი და ძალიან ოპტიმისტურად ვუყურებ, თუმცა იქ მე ვერ ვნახე დასაბუთება ან ოპტიმიზმის საფუძველი. დანარჩენი, რა თქმა უნდა, წერილში საუბარი იყო მიღწევებზე ადამიანის უფლებების კუთხით, სიტყვის თავისუფლების, ჯანდაცვის მიმართულებით. სამუშაო ადგილებს რაც შეეხება, მინდა ვთქვა, რომ ნაწილობრივ სადღაც შემცირდა, სადღაც მეტი შეიქმნა, თუმცა ვერ ვიტყვი, რომ მთლიანობაში ამ კუთხით ვითარება მკვეთრად დადებითად შეიცვალა“, - განაცხადა თამაზ მეჭიაურმა.