,,ეს იყო ბევრი ,,ოსანა“ ექსპრემიერის მისამართით“ - თორნიკე შარაშენიძე ივანიშვილის წერილზე

პოლიტიკა - 16:22, 30 May, 2016

1984

ექსპრემიერის ბიძინა ივანიშვილის ღია წერილს აფასებს ჯიპა-ს პროფესორი, ექსპერტი თორნიკე შარაშენიძე. ,,ნიუპოსტთან“ კომენტარში ექსპერტი ამბობს, რომ ივანიშვილი რეალობას მოწყვეტილია და დღეს არსებულ ყველაზე მწვავე კითხვებზე პასუხები გაცემული არ იყო.

,,დავიწყოთ იქიდან, რომ ამ წერილს უმზადებდა გუნდი, რომელიც ცდილობდა, რომ ესიამოვნებინა ყველანაირად და რაც შეიძლება ბევრი ყოფილიყო შიგნით ,,ოსანა“ ყოფილი პრემიერ-მინისტრის მისამართით. გუნდმა ალბათ მიაღწია და ივანიშვილიც ალბათ კმაყოფილია.

როგორც სჩანს თავად ივანიშვილი ვერ ხვდება ქვეყანაში რეალურად რა სიტუაციაა, მიიჩნევს, რომ რუსთავი 2- ყველაფერს იტყუება და სიმართლეს ამბობენ მხოლოდ ის არხები, რომლებიც მეტ-ნაკლებად მისი კონტროლის ქვეშაა. არცაა გასაკვირი, რადგან ის სამი წელია ხელისუფლებას ჩამოშორდა, ცხოვრობს ცალკე თავის შუშის სასახლეში, რამდენადაც მე ვიცი, ნახულობს ძალიან ცოტა ადამიანს, ვისგანაც ის ინფორმაციას იღებს. ისინიც ცდილობენ რომ აქონ-ადიდონ, უთხრან, რომ ყველაფერი კარგად არის. ასე, რომ საბოლოო ჯამში მივიღეთ შედეგად ეს წერილი, სადაც დაახლოებით ერთი მესამედი არის ისევ 9-წლიანი ეპოქის ლანძღვა-გინება და დანარჩენი დაწერილი იყო ისე, რომ ყველაფერი არის კარგად, ყველაზე მწვავე კითხვებზე პასუხები გაცემული არ იყო, იგივე ლარის კურსი, 100 ქარხანაზე და მსგავს რაღაცეებზე აღარ ვსაუბრობ. იქ იყო ასევე სადღეგრძელოების მაგვარი რაღაცეები - ვაზი, საწნახელი... როგორც სჩანს, გუნდში ჰყავს ერთი ორი მოპოეტო ლირიული ელემენტი, რომელიც ცდილობს ამით ასიამოვნოს თავის პატრონს.

იმიტომაც არის ქვეყნის საქმე კარგად, რომ როდესაც ეს კაცი გადაწყვეტილებას იღებს, ის დაფუძნებული არასწორ შეფასებასა და ანალიზზე. ამიტომაც ვიღებთ კორცხელისმაგვარ სისულელეებს, როგორ შეიძლება ჭკუათმყოფელ ადამიანს მსგავსი რამ თავში მოუვიდეს?“ - აცხადებს შარაშენიძე.