საქართველოს ყოფილი პრემიერ-მინისტრის, ბიძინა ივანიშვილის წერილს მმართველი გუნდის წევრები ეხმაურებიან. საქართველოს ფინანსთა მინისტრის, ნოდარ ხადურის განცხადებით, საქართველომ შეძლო ეკონომიკური ზრდის შენარჩუნება და კარგი მაჩვენებლების მიღწევა. ქვეყანაში კი უმუშევრობის დონე რეკორდულად დაბალია:

„საქართველოში უმუშევრობა დღეს რეკორდულად დაბალია, 12%-ია , ეს არ არის ცოტა, ძალიან ბევრია გასაკეთებელი, მაგრამ დღეს გაცილებით ნაკლები ადამიანია უმუშევარი, ვიდრე იყო თუნდაც 4 წლის წინ. თქვენ ნახეთ ის სტატისტიკური ინფორმაცია, რომელიც ბატონმა ბიძინამ მოიყვანა და ინვესტიციების რაოდენობა გაზრდილია, თუნდაც ის, რომ აპრილში 4,3% იყო ეკონომიკური ზრდა, აჩვენებს იმას, რომ საქართველო დგას სწორ გზაზე და იმ რთულ, ტურბულენტურ რეგიონსა და გარემოში, რომელშიც ჩვენ ვცხოვრობთ, არა თუ შევძელით შეგვენარჩუნებინა ეკონომიკური ზრდა, არამედ ვაღწევთ ძალიან კარგ მაჩვენებლებს“, - განაცხადა ნოდარ ხადურმა.