საქართველოს ყოფილმა პრემიერ-მინისტრმა, ბიძინა ივანიშვილმა წერილი გამოაქვეყნა. ივანიშვილი საუბრობს ქვეყანაში მიმდინარე მოვლენებზე და ასევე ხაზს უსვამს „თანაინვესტირების ფონდის“ საქმიანობას, ყოფილი პრემიერი აცხადებს, რომ მას საქართველოში არავითარი ბიზნესინტერესი არ აქვს. წერილში ასევე ნათქვამია, რომ ივანიშვილი „ხელისუფლებაში მოსვლისა და რაიმე თანამდებობისთვის არ იბრძვის“.

საკუთარ წერილში ბიძინა ივანშვილი ქართულ მედიაზეც საუბრობს და აცხადებს, რომ მედია ხელისუფლების კონტროლისგან სრულად გათავისუფლდა:

„მედია სრულად გათავისუფლდა ხელისუფლების კონტროლისგან. თვალსაჩინო ფაქტია, რომ საქართველოში არასდროს ყოფილა ამდენი ტელევიზია, რამდენიც დღეს არის და, სხვათა შორის, ვერც იმას გაიხსენებს ვინმე, რომ მთავრობის მისამართით ასეთი დაუნდობელი კრიტიკა და ლანძღვა მოესმინოს; თანაც, პირველად დამოუკიდებელი საქართველოს ისტორიაში, მთავრობას საკუთარი ტელევიზია არ გააჩნია“, - ნათქვამია ბიძინა ივანიშვილის წერილში.