საქართველოს პრეზიდენტი სლოვაკელ კოლეგას მასპინძლობს. დახურული შეხვედრის შემდეგ გიორგი მარგველაშვილმა და ანდრეი კისკამ მედიისთვის განცხადებები გააკეთეს.

„ჩემთვის დიდი პატივია და ჩვენი ქვეყნისთვის, რომ შედგა პირველი ისტორიული ვიზიტი სლოვაკეთის პრეზიდენტისა საქართველოში, ეს ვიზიტი ბუნებრივია იქნება მნიშვნელოვანი იმპულსის მიმცემი ჩვენს ქვეყნებს შორის თანამშრომლობისთვის. ჩვენ გვქონდა მეგობრული შეხვედრა შარშან, ეს მეგობრული შეხვედრა გაგრძელდა დღესაც და ჩვენ შევთანხმდით იმ ძირითად ტრადიციულ მიმართულებებზე, რომელსაც ჩვენ ვავითარდებდით ერთობლივ ფორმატებში. მინდა მადლობა გითხრათ თქვენი მტკიცე მხარდაჭერისთვის საქართველოს ევროპული და ევროატლანტიკური წინსვლისკენ.

მე მიმაჩნია, რომ თქვენი ევროკავშირის პრეზიდენტობა, რომელიც იწყება ერთ თვეში, იქნება მნიშვნელოვანი შესაძლებლობა საქართველოსთვის, რომ უფრო გააღრმავოს ჩვენი ევროპული ინტეგრაციის ტემპი. ჩვენ გვაქვს უკვე ტრადიციული თანამშრომლობა, როგორც კულტურულ, ასევე სამხედრო სფეროში და ბუნებრივია, ჩემი ვიზიტისას, როდესაც ვიყავი სლოვაკეთში და ახლა, თქვენი ვიზიტით, იქმნება სულ უფრო მეტი ახალი შესაძლებლობა ბიზნესთანამშრომლობის თვალსაზრისით.

სასიამოვნოა, რომ თქვენ ჩამობრძანდით ბიზნესმენების დიდ ჯგუფთან ერთად, ბუნებრივია, რომ ის თანამშრომლობები, ის მემორანდუმები, რომლებიც დაიდება ჩვენს პალატებს შორის, გახსნის ფართე შესაძლებლობას სლოვაკი ბიზნესმენების დაინტერესებისა საქართველოში. მსურს ხაზი გავუსვა იმას, რომ ჩვენ შორის სულ უფრო იზრდება როგორც ტურიზმი, ასევე კულტურული თანამშრომლობის სხვა ფორმები“, - განაცხადა გიორგი მარგველაშვილმა.