"ეს იყო თავიდანვე ცრუ აჟიოტაჟი"- ონოფრიშვილი სებ-ის ფინანსური ზედამხედველობის სამსახურზე

პოლიტიკა - 18:35, 27 May, 2016

1612

„თავისუფალი დემოკრატების“ წარმომადგენელი დავით ონოფრიშვილის განცხადებით მმართველმა გუნდმა სებ-იდან ფინანსური ზედამხედველობის სამსახურის გამოყოფა დამნაშავის ძებნის მოტივით დაიწყო, იყო მცდელობა რომ მთავრობას ლარის კრიზისის დროს თავი გაემართლებინა და დაბრალებოდა ეროვნულ ბანკს. ახლა კი საერთაშორისო საფინანსო ინსტიტუტების წინააღმდეგობამ შედეგი გამოიღო და ხელისუფლებამ რეალობა გაითვალისწინა. აღნიშნული კომენტარი ონოფრიშვილმა ეკონომიკის მინისტრის განცხადების შეფასებისას გააკეთა. ქუმსიშვილის თქმით ფინანსური ზედამხედველობის სამსახური ისევ ეროვნული ბანკის შემადგენლობაში დარჩება.

„ეს იყო თავიდანვე ცრუ აჟიოტაჟი, რეალობასთან კავშირი არ ქონდა და იყო მცდელობა რომ მთავრობას ლარის კრიზისის დროს თავი გაემართლებინა და დაბრალებოდა ეროვნულ ბანკს, აქ მოინახა ფინანსური ზედამხედველობის სამსახური, თითქოს მის გამო ხდებოდა ლარის გაუფასურება. ეს აბსოლუტურად მცდარი მოსაზრება იყო. ამ საკითხს არცერთი საერთაშორისო საფინანსო ინსტიტუტი არ უჭერდა მხარს.“- განაცხადა ონოფრიშვილმა.

შეგახსენებთ, რომ საფინანსო სექტორის ზედამხედველობის სამსახური თამაზ მეჭიაურის მიერ მომზადებული კანონის მეშვეობით ეროვნულ ბანკს გასულ წელს გამოეყო.მეჭიაურის ინიციატივას პრეზიდენტი, ეროვნული ბანკი და საერთაშორისო საფინანსო ინსტიტუტებიც ეწინააღმდეგებოდნენ. გასული წლის ივლისში პრეზიდენტმა პარლამენტის მიერ მიღებულ კანონპროექტს ვეტო დაადო, პარლამენტმა ვეტო დაძლია, პრეზიდენტმა კი მეჭიაურის მიერ მიღებულ კანონპროექტს ხელი 10 სექტემბერს მოაწერა. მას შემდეგ ერთიანმა ნაციონალურმა მოძრაობამ და თავისუფალმა დემოკრატებმა ეროვნული ბანკიდან საფინანსო ზედამხედველობის სამსახურის გატანა საკონსტიტუციო სასამართლოშიც გაასაჩივრეს.