ოთხწლიანი პაუზის შემდეგ გალში დღეს ინციდენტების პრევენციისა და მათზე რეაგირების მექანიზმის ფარგლებში გამართული შეხვედრა დასრულდა. მოლაპარაკებები თითქმის ოთხი საათის განმავლობაში მიმდინარეობდა. შემდეგი შეხვედრა 6 ივლისისთვის დაინიშნა.

საქართველოს ცენტრალური ხელისუფლების წარმომადგენლები კონტროლირებად ტერიტორიაზე უკვე გადმოვიდნენ. როგორც ცნობილია, შეხვედრაზე მთავარი განსახილველი თემა რუსი ოკუპანტის მიერ ხურჩასთან გიგა ოთხოზორიას მკვლელობის საქმე იყო.

ირაკლი ბერაიას განცხადებით, მათ კატეგორიულად მოითხოვეს მკვლელობაში ბრალდებული პირის გადმოცემა, რათა მოხდეს მისი ქართული კანონმდებლობის შესაბამისად გასამართლება.

„მივიღეთ ინფორმაცია, რომ საქმეს იძიებს დეფაქტო ხელისუფლების ე.წ. სამხედრო პროკურატურა. ინფორმაცია განზრახ მკვლელობაში ბრალდებული პირის დაკავების შესახებ არ დაგვიდასტურეს. რაც შეეხება გადმოცემის საკითხს, მათ გვითხრეს, რომ ამას სჭირდება შესაბამისი სამართლებრივი ბაზა და ბუნებრივია, ამაზე საუბარი არის ნაადრევი. ჩვენთვის ეს თავისთავად არის მიუღებელი, იმიტომ, რომ ენგურის ხიდს გაღმა არ არსებობს საერთაშორისო სამართლის არანაირი სუბიექტი, არსებობს ჩვეულებრივი, ოკუპირებული ტერიტორია, რომელზეც კონტროლი ხორციელდება საოკუპაციო ძალის მიერ და ჩვენი მთავარი მიზანი იქნება ამ მიმართულებით უცვლელი, ჩვენი პოზიცია პრინციპული, ჩვენი მოთხოვნები არ შეიცვლება, ჩვენ ყველა ფორმატში დავაყენებთ, რომ გიგა ოთხოზორიას მკვლელი წარსდგეს ქართული მართლმსაჯულების წინაშე. მათ გვითხრეს, რომ არანაირ ექსტრადირებაზე საუბარი არ შეიძლება იყოს, იმიტომ, რომ ექსტრადირება არის ორი საერთაშორისო სამართლის სუბიექტს შორის შესაბამისი ურთიერთობების საფუძველზე განხორციელებული ქმედება, ჩვენთვის ეს არის აბსოლუტურად მიუღებელი. როდესაც მისი ადგილსამყოფელის შესახებ დავუსვით კითხვები, მათ გვითხრეს, რომ ისინი ე.წ. სამხედრო პროკურატურის წარმომადგენლები არ არინ და შესაბამისად აღნიშნულ ინფორმაციას არ ფლობენ“, - განაცხადა ირაკლი ბერაიამ.