"რაშიდ კანჯი-ოღლი დაკავებული არაა"- აფხაზეთის დე ფაქტო პროკურატურა

პოლიტიკა - 17:02, 26 May, 2016

5429

გავრცელებულ ინფორმაციას იმის შესახებ, რომ გიგა ოთხოზორიას მკვლელობაში ეჭვმიტანილი რაშიდ კანჯი-ოღლი დაკავებულია აფხაზეთის დე ფაქტო რესპუბლიკის პროკურატურა უარყოფს. როგორც დე ფაქტო უწყებაში „ეხო კავკაზა“-ს კორესპონდენტს განუცხადეს, ამ დროისთვის კანჯი ოღლის შეჩერებული აქვს უფლებამოსილება და წარმოებს სამსახურეობრივი მოკვლევა. ამასთანავე დე ფაქტო პროკურატურა ადასტურებს იმ ფაქტს, რომ სოფელ ხურჩაში მომხდარ მკვლელობასთან დაკავშირებით აღძრულია სისხლის სამართლის საქმე.

როგორც დე ფაქტო პროკურატურის წამორმადგენლებმა „ეხო კავკაზა“-ს განუცხადეს დანაშაული საქართველოს კონტროლირებად ტერიტორიაზე მოხდა და გამოძიების მასალები და ნივთმტკიცებებიც ქართულ მხარეს აქვს:

„დანაშაული მოხდა საზღვრის ქართულ მხარეს - მათ აქვთ ვიდეოჩანაწერი, ტყვიები, ცხედარი და ა.შ. აფხაზეთის მხარეს არანაირი ნივთიერი მტკიცებულება არ აქვს“ . ამსათანავე დე ფაქტო საგამოძიებო უწყების განცხადებით გამოკითხული მოწმეები აცხადებენ, რომ ინციდენტი გიგა ოთხოზორიას მიერ იყო პროვოცირებული და სწორედ მან წამოიწყო ჩხუბი.

ოკუპირებული აფხაზეთის დე ფაქტო საგარეო საქმეთა სამინისტრო აპირებს ქართულ მხარეს მტკიცებულებების წარდგენის მოთხოვნით მიმართოს. ამ მოთხოვნის დაყენებას გალში დაგეგმილი ინციდენტების პრევენციისა და მათზე რეაგირების მექანიზმის (IPRM) საგანგებო შეხვედრაზე აპირებენ.