გალში IPRM შეხვედრა გაიმართება - მთავარი თემა გიგა ოთხოზორიას მკვლელობა იქნება

პოლიტიკა - 12:00, 26 May, 2016

1512

ხვალ 27 მაისს გალში დაგეგმილია ინციდენტების პრევენციისა და მათზე რეაგირების მექანიზმის (IPRM) საგანგებო შეხვედრა, რომელიც ბოლო 4 წლის განმავლობაში პირველად იმართება. შეხვედრაზე მთავარი განსახილველი საკითხი 19 მაისს ზუგდიდის რაიონის სოფელ ხურჩაში, გამყოფი ხაზის მიმდებარედ საქართველოს მოქალაქის გიგა ოთხოზორიას მკვლელობის ფაქტი იქნება. ქართული მხარის განცხადებით აფხაზეთში უსაფრთხოების კუთხით მძიმე მდგომარეობაა და ოკუპირებულ რეგიონებში უსაფრთხოების საერთაშორისო მექანიზმების არსებობა აუცილებელია.

შერიგებისა და სამოქალაქო თანასწორობის საკითხებში სახელმწიფო მინისტრის პირველი მოადგილის ქეთევან ციხელაშვილის განცხადებით. შეხვედრა სასწრაფოდ ქართული მხარის მოთხოვნით ჩაინიშნა:

„ასეთი შეხვედრა არ გვქონია ფაქტობრივად ბოლო 4 წლის განმავლობაში. ახლა ეს შეხვედრა ჩაინიშნა სასწრაფოდ ქართული მხარის მოთხოვნით რა თქმა უნდა მთავარი საკითხი იქნება ის ტრაგედია, გიგა ოთხოზორიას მკვლელობა და ქართული მხარე დააყენებს ყველა იმ საკითხს, რომელიც უკავშირდება ამოცანას, რომ უმკაცრესად იყვნენ დასჯილი და პასუხი აგონ დამნაშავეებმა“- განაცხადა ქეთევან ციხელშვილმა.

სახელმწიფო მინისტრის ევროპულ და ევროატლანტიკურ სტრუქტურებში ინტეგრაციის საკითხებში დავით ბაქრაძის თქმით IPRM-ის მნიშვნელობა სამწუხაროდ კიდევ ერთხელ დადასტურდა ხურჩაში მომხდარი ტრაგიკული ფაქტით:

„ჩვენი ძალიან დიდი ძალისხმევის შედეგი იყო რომ ჟენევის მოლაპარაკების ბოლო რაუნდზე მიღწეული იქნა შეთანხმება, რომ ინციდენტების პრევენციისა და მათზე რეაგირების მექანიზმი ამოქმედებულიყო, რომლის მნიშვნელობაც სამწუხაროდ კიდევ ერთხელ დადასტურდა ამ ტრაგიკული ფაქტით. რა თქმა უნდა ეს საკითხი იქნება განხილვის მთავარი თემა“- განაცხადა დავით ბაქრაძემ.