იმედს ვიტოვებ, ნაცმოძრაობა შეინარჩუნებს ბოიკოტს, მაგრამ კენჭისყრაში მიიღებს მონაწილეობას

იმედს ვიტოვებ, ნაცმოძრაობა შეინარჩუნებს ბოიკოტს, მაგრამ კენჭისყრაში მიიღებს მონაწილეობას - კაციტაძე გერმანულ მოდელზე

პოლიტიკა - 18:39, 25 May, 2016

2497

“ახალი მემარჯვენეების“ ლიდერი მამუკა კაციტაძე იმედს იტოვებს, რომ „ნაციონალური მოძრაობა“ მიუხედავად მის მიერ გამოცხადებული ბოიკოტისა ე.წ გერმანულ მოდელს მხარს დაუჭერს.

როგორც საარჩევნო სისტემის ცვლილებაზე მომუშავე ჯგუფის ერთ-ერთმა წევრმა „ნიუპოსტთან“ განმარტა, რომ საპარლამენტო მუშაობის ბოიკოტი კენჭისყრაში ერთჯერად მონაწილეობაზე უარის თქმას არ ნიშნავს.

„თუ ნაციონალურ მოძრაობას არ უნდა გერმანული მოდელი ჩავარდეს და ამით „ქართული ოცნების“ წისქვილზე დაასხას წყალი, მას შეუძლია ბოიკოტის რეჟიმი გააგრძელოს რიგი საკითხთა განხილვის პროცესში, მაგრამ კონკრეტულ კენჭისყრებში მან სრული მობილიზაციით მიიღოს მონაწილეობა, რაც ხელს შეუწყოფს საარჩევნო კანონმდებლობის შეცვლას. თუ ეს მათ არ გააკეთეს, მაშინ არა თუ ქართული ოცნების თამაშს თამაშობენ, მე აქ გარიგებას დავინახავდი, რომ ქვეყანაში გაგრძელდეს ორპოლუსიანი პოლიტიკა, ხელისუფლებაში „ქართული ოცნების“ ყოფნით და ნაციონალური მოძრაობის მთავარ ოპოზიციური ძალის სტატუსის შენარჩუნებით. ამის შემდეგ ძარღვებდაბერილი შეძახილები და ჩხუბები პარლამენტში თუ მის გარეთ, მათ შორის კორცხელის ინცინდენტი ყველაფერი ერთად მოიაზრება, როგორც ამ ორი პოლიტიკური პარტიის ერთობლივი სპექტაკლი"- აღნიშნა კაციტაძემ.

მისი თქმით, "ნაციონალურ მოძრაობას" არაერთხელ ჰქონდა გაცხადებული, რომ ისინი მხარს უჭერდნენ, "გერმანულ მოდელს".

"მაშინ როცა პარლამენტში პროცედურები დაიწყო და ასეთ დროს პროცესიდან გასვლა სხვა არაფერია თუ არა შეთანხმებული მოქმედება საარჩევნო სისტემის არშეცვლისთვის. მე იმედს ვიტოვებ, რომ ნაციონალური მოძრაობა შეინარჩუნებს ბოიკოტს, მაგრამ კონკრეტულ კენჭისყრაში სრული მობილიზაციით მიიღებს მონაწილეობას მოქმედი საარჩევნო სისტემის შესაცვლელად“- თქვა კაციტაძემ „ნიუპოსტთან“ საუბრისას.