საქართველოს პრეზიდენტის ადმინისტრაცია კორცხელში ოთხი დღის წინ მომხდარ დაპირისპირებას ეხმაურება. დღეს გამართულ პრესკონფერენციაზე, პრეზიდენტის პრეს-სპიკერმა, ეკა მიშველაძემ განაცხადა, რომ ის, რაც მოხდა არის უფრო მეტი, ვიდრე სამართალდარღვევა და სახელმწიფო ვალდებულია, აღკვეთოს ნებისმიერი ძალადობა.

„კიდევ ერთხელ ვეხმაურებით საკრებულოს შუალედურ არჩევნებზე მომხდარ ინციდენტებს. ამასთან დაკავშირებით, ხაზგასმით ვაცხადებთ, რომ სახელმწიფო ვალდებულია, აღკვეთოს ძალადობა. ეს არის მისი ვალდებულება და არა კეთილი ნების გამოვლინება. სახელმწიფო ინსტიტუტების გამართულად მუშაობა არის ქვეყნის დემოკრატიულობისა და თითოეული მოქალაქის უსაფრთხოების გარანტი. სწორედ ინსტიტუტებმა უნდა უზრუნველყოს ჩვენი ქვეყნის მოქალაქეების უსაფრთხოება, მაღალი სტანდარტის საარჩევნო პროცესი, აღკვეთოს ძალადობის ყოველგვარი გამოვლინება.

კიდევ ერთხელ ვუსვამთ ხაზს, ის რაც მოხდა კორცხელში, არის უფრო მეტი, ვიდრე სამართალდარღვევა. ეს არის სახელმწიფოებრიობის წინააღმდეგ მიმართული ქმედება. იმ ადამიანების გარდა, რომლებმაც უშუალოდ მიიღო ფიზიკური დაზიანება, დაზარალებულია ამომრჩეველი და სახელმწიფოს ინტერესები

მომხდარზე დროული და ეფექტური რეაგირება. მმართველმა გუნდა უნდა გაითავისოს, რომ სწორედ ის არის ამ ქვეყნის ხელისუფლება და ყველა კანონდარღვევაზე უნდა ჰქონდეს ადეკვატური რეაქცია. პრეზიდენტი მხარს უჭერს პრემიერ-მინისტრის სახელმწიფოებრივ პოზიციას კორცხელის ინციდენტთან დაკავშირებით, რომ უსწრაფესად გამოვლინდეს ყველა დამნაშავე და თითოეულ მათგანს კანონის შესაბამისად დაეკისროს პასუხისმგებლობა“, - განაცხადა პრეზიდენტის პრესსპიკერმმა.