საპარლამენტო უმცირესობის წევრი ნუგზარ წიკლაური მიიჩნევს, რომ საქართველოს ენერგეტიკის მინისტრი, ვიცე-პრემიერი კახა კალაძე დაუყოვნებლივ უნდა დაიკითხოს კორცხელის ინციდენტთან მიმართებით. წიკლაურმა პარლამენტის დღევანდელ სხდომაზე განაცხადა, რომ კახა კალაძე კორცხელში მომხდარი ძალადობის ბანდფორმირების მეთაურია:

„25 წლის წინ, როცა საქართველოს დამოუკიდებლობა გამოცხადდა, ზვიად გამსახურდიას განზრახული ჰქონდა, რომ ქვეყანა ქართულ ჰუმანისტურ ტრადიციაზე დაეფუძნებინა, მაგრამ 25 წლის თავზე რაც მივიღეთ, ის იდეალი არ არის, რაც მაშინ ქართველ ხალხს ჰქონდა. განსაკუთრებული სისასტიკე იყო მოქალაქეების. ეს იყო კარგად მომზადებული ადამიანების დევნა და სამეგრელოს გათელვის მცდელობა. ყველაზე უფრო შთამბეჭდავი იყო კრიმინალისგან შეშინებული პოლიციელის სურათი. კრიმინალებისგან ნაცემი პოლიციელი იყო, რომელიც სახელმწიფოს წარმოადგენდა, თუმცა, სახელმწიფო იქ არ იყო. ის პოლიციელი ქართული სახელმწიფოს დამცირებული შვილი იყო. უსუსური პრემიერი ვიხილეთ, რომელსაც უკანონობის აღსაკვეთად არაფერი შეუძლია. უსუსური პოლიცია და უმოქმედო პროკურატურა ვიხილეთ, რომელსაც სისხლის სამართლის დანაშაულის აღძვრა არ შეუძლია“, - განაცხადა ნუგზარ წიკლაურმა პარლამენტის დღევანდელ სხდომაზე.