ინტერპარტიული ჯგუფი ხელისუფელებას ხმებით ვაჭრობის მცდელობაში ადანაშაულებს

პოლიტიკა - 11:44, 25 May, 2016

800

ინტერპარტიული ჯგუფი ხელისუფლებას საარჩევნო სისტემის გერმანულ მოდელთან დაკავშირებით ხმებით ვაჭრობაში ადანაშაულებს.

არასაპარლამენტო ოპოზიციის ინფორმაცით, ხელისუფლება შეთავაზებული მოდელის ჩასაგდების სანაცვლოდ საპარლამენტო ოპოზიციას უფასო სარეკლამო დროს სთავაზობს.

როგორც გიორგი ახვლედიანმა განაცხადა, იმ შემთხვევაში თუ საკმარისი 76 ხმა ვერ მოიპოვა ამ ვარიანტმა, ეს იქნება ოპოზიციასთან გარიგების დასტური.

"ხელისუფლებას გამოცხადებული აქვს ვაჭრობა, ის საპარლამენტო ოპოზიციურ პარტიებს მისცემს ჩვენთვის წართმეული სარეკლამო დროის დიდ ნაწილს, ოღონდ არ დაუჭირონ მხარი გერმანულ მოდელს. თუ ეს მოდელი ჩავარდა პარლამენტში, ეს იქნება იმის დასტური რომ ოპოზიციამ ეს თემა გაყიდა"- აღნიშნა ახვლედიანმა.

„სამოქალაქო ალიანსი თავისუფლებისთვის“ თავმჯდომარე ზურაბ ხარატიშვილი კი აცხადებს, რომ ხელისუფლება ცდილობს, არჩევნები რინგს დაამსგავსოს.

"ჩვენ ბოლომდე ვიბრძოლებთ ამ მოდელის გასატანად"- თქვა ხარატიშვილმა.

ინტერპარტიული ჯგუფის ბრალდებებს აბსურდულს უწოდებენ უმრავლესობაში. როგორც დეპუტატმა გია ჟორჟოლიანმა თქვა, ეს განცხადებები კომიკურია.

"როგორ შეძლებს უმრავლესობა ხმების მოსყიდვას, თუ ეს ოპოზიციური ჯგუფები არიან წინააღმდეგი იმისა რომ ეს საარჩევნო კანონი მიღებული იქნას"- აღნიშნა ჟორჟოლიანმა.

დეპუტატი დარწმუნებულია, რომ ე.წ გერმანული მოდელის მხარდაჭერა არ მოხდება. "ახლა ამის დრო არ არის, უმრავლესობა ამ მოდელს მხარს არ დაუჭერს".

კომენტარი გააკეთა საპარლამენტო ოპოზიციის წევრმა ვახტანგ ხმალაძემაც.

"ეს კანონი მომზადებულია, ჩვენ მიერ არის ინიცირებული და ჩვენ ბოლომდე დავიცავთ ამ პოზიციას. ვისაც რა უკადრია, გონია რომ სხვაც ამის მკადრებელია"- აღნიშნა დეპუტატმა.