საქართველოს პარლამენტის იურიდიული კომიტეტის ინიციატივით, სისხლის სამართლის საპროცესო კოდექსში შესაძლოა ცვლილებები შევიდეს, რომლის მიხედვითაც კანონიერ ძალაში შესული განაჩენების გადასინჯვის საფუძვლები ფართოვდება, მათ შორის პროკურატურის დადგენილების შემთხვევაში, სასამართლოს უფლება ექნება, საქმეს ხელახლა გადახედოს.

აღნიშნულ თემაზე კომენტარი კომიტეტის წევრმა ზაქარია ქუცნაშვილმა გააკეთა. მისი თქმით აღნიშნული ცვლილება პროცესს აჩქარებს და ამარტივებს:

“ჩვენ მოვძებნეთ ფორმულა, როცა ისევ სასამართლო შეამოწმებს ამ ამბავს, მაგრამ არა ცალკე არამედ სხვა მტკიცებულებებთან ერთად. თუ მოსამართლეს შეექმნება რწმენა, რომ პროკურატურის მიერ დადგენილი ადამიანის უფლებების არსებითად დარღვევა, როგორც ფაქტი და სხვა მტკიცებულებები, რომელიც საქმეში არის, ერთობლივად შეიძლება იყოს განაჩენის სრულად ან ნაწილობრივ შეცვლის საფუძველი, ისევ სასამართლო მიიღებს გადაწყვეტილებას. ამ შემთხვევაში ეს მიდის პირდაპირ სააპელაციო სასამართლოში, რაც ჩვენი მოქალაქეებისთვის აჩქარებს პროცესს და ამარტივებს,“ - განაცხადა „ქართული ოცნების“ წევრმა, ზაქარია ქუცნაშვილმა.

დადებითად აფასებს ცვლილებებს ფრაქცია რესპუბლიკელების წევრი ვახტანგ ხმალაძეც მისი თქმით აღნიშნული ცვლილება ადამიანებს საშუალებას მისცემს შელახული უფლებები აღიდგინოს:

"ეს მიდგომა საშუალებას მოგვცემს, თავი დავიზღვიოთ დაუსაბუთებელი საჩივრებისგან და, მეორე მხრივ, თუკი პირის უფლებები იყო შელახული, აღდგეს ამ პირის უფლებები და მის მიმართ იზეიმოს სამართალმა.“- აღნიშნა ხმალაძემ.