პაატა ბურჭულაძის პოლიტიკური მოძრაობა ,,ქართულ ოცნებას“ სიცრუის ტირაჟირებაში ადანაშაულებს

პოლიტიკა - 18:18, 24 May, 2016

6114

„პაატა ბურჭულაძის მოძრაობა სახელმწიფო ხალხისთვის” განცხადებას ავრცელებს და ,,ქართულ ოცნებას“ ცრუ ბრალდებასა და პოლიტიკური მოძრაობის მიზანმიმართულ დისკრედიტაციაში ადანაშაულებს.

,,გაუგებარია განცხადება იმასთან დაკავშირებით, რომ ქართულმა ოცნებამ 2016 წლის 22 მაისს ჩატარებულ ადგილობრივი თვითმმართველობის შუალედურ არჩევნებში, ქალაქ ოზურგეთში დაამარცხა ნაციონალური მოძრაობის და პაატა ბურჭულაძის ,,მოძრაობა სახელმწიფო ხალხისათვის“ ერთობლივად წარდგენილი მაჟორიტარი კანდიდატი. ვინაიდან 2016 წლის 21 მაისს გაიმართა მოძრაობა ,,სახელმწიფო ხალხისათვის“ სადამფუძნებლო ყრილობა და ამ მომენტისთვის პარტიის სადამფუძნებლო დოკუმენტები რეგისტრაციის მიზნით, ჯერ კიდევ არ არის შეტანილი საჯარო რეესტრის ეროვნულ სააგენტოში, მიგვაჩნია, რომ ქართული ოცნების მხრიდან ადგილი აქვს ,,მოძრაობა სახელმწიფო ხალხისთვის“ მიზანმიმართულ დისკრედიტაციას და ცრუ ბრალდებებს, რაც გამოიხატა ქართული ოცნების მხრიდან სიცრუის ტირაჟირებასა და საქართველოს მოქალაქეების შეცდომაში შეყვანაში. შესაბამისად მოძრაობა „სახელმწიფო ხალხისთვის“ ლიდერების განცხადებით გაუგებარია როგორ შეძლებდა იურიდიულად პაატა ბურჭულაძის პარტია საერთოდ კანდიდატის დასახელებას?!

საქართველოს ორგანული კანონის ,,საქართველოს საარჩევნო კოდექსი“ 141-ე მუხლის პირველი პუნქტის თანახმად, ,,საკრებულოს არჩევნებში მონაწილეობის უფლება აქვს პარტიას, საარჩევნო ბლოკს, პარტიის, საარჩევნო ბლოკის, ამომრჩეველთა 5 - კაციანი საინიციატივო ჯგუფის მიერ წარდგენილ კანდიდატს, რომელიც რეგისტრირებულია შესაბამის საარჩევნო კომისიაში“- ნათქვამია განცხადებაში.