სასტუმრო „ჰოთელს & პრეფერენს ჰუალინგ თბილისში“ რიგით მე-10 „საქართველოს თავდაცვის და უსაფრთხოების კონფერენცია“ (GDSC) ოფიციალურად გაიხსნა.

კონფერენციის მონაწილე სტუმრებს სიტყვით მიმართეს საქართველოს თავდაცვის მინისტრმა თინათინ ხიდაშელმა, აშშ-ის ატლანტიკური საბჭოს აღმასრულებელმა ვიცე-პრეზიდენტმა დეიმონ უილსონმა და საქართველოს პრემიერ-მინისტრმა გიორგი კვირიკაშვილმა.

თავდაცვის მინისტრმა საერთაშორისო ფორუმის მონაწილეებს და პარტნიორებს მადლობა გადაუხადა და წარმატებული სამუშაო დღე უსურვა.

კონფერენციას საქართველოს პარლამენტის თავმჯდომარე დავით უსუფაშვილიც შეუერთდა. კონფერენციაზე იმყოფება ნატო-ს გენერალური მდივნის სპეციალური წარმომადგენელი ჯეიმს აპატურაიც, რომელმაც ჟურნალისტებთან საუბრისას რუსეთიდან მომავალ საფრთხეებზე ისაუბრა:

„მეტი ნატო საქართველოში - ამ თვალსაზრისით ჩვენ ვასრულებთ პირობას. რადგან აქ ჩრდილო ატლანტიკური ალიანსის არაერთი მრჩეველია. გავხსენით ერთობლივი საწვრთნელი ცენტრი, ტარდება წვრთნები. რაც შეეხება ნატო-ში მეტ საქართველოს, გეტყვით, რომ ვარშავის სამიტზე სხვა არაწევრ სახელმწიფოებთან შედარებით საქართველო მეტად წარმომადგენლობითი იქნება, თუნდაც შეხვედრების რაოდენობით, თქვენი ქვეყანა მონაწილეობას მიიღებს შეხვედრებში მთავრობის მეთაურების, საგარეო საქმეთა და რა თქმა უნდა თავდაცვის მინისტრების დონეზე. ეს რაც შეეხება სამიტს, შემდეგ კი იქნება მეტი ახალი იდეა, თქვენ იხილავთ ახალ ინიციატივებს. ყველასთვის ცნობილია რუსეთის მზარდი თავდაცვითი მოქმედებები, წვრთნები საზღვრებთან, რაც ჩვენი შეშფოთების საგანია, რუსეთი თავისი აგრესიული თუ პოტენციურად აგრესიული ქმედებებით გვაიძულებს სიფრთხილეს, მაგრამ ამ ყველაფერზე ერთად საუბარია საჭირო“, - განაცხადა ჯეიმს აპატურაიმ.