პარლამენტის მიერ მესამე მოსმენით დამტკიცებულ საკონსიტუციო სასამართლოს შესახებ კანონში შეტანილ ცვლილებას, რომელიც პრეზიდენტმა განსახილველად ვენეციის კომისიას გადაუგზავნა, შეფასებები მოჰყვა პოლიტიკურ სპექტრში. რა მოლოდინები აქვს ოპოზიციას და უნდა ველოდეთ თუ არა პრეზიდენტის ვეტოს, ამასთან დაკავშირებით ,,ნიუპოსტთან" კომენტარი გააკეთა ედპ-ს ლიდერმა. ბაჩუკი ქარდავა აცხადებს, რომ მმართველი პარტიის მიერ საკონსტიტუციო სასამართლოსთან დაკავშირებით მიღებული გადაწყვეტილება, პირდაპირ მიანიშნებს იმაზე, თუ რა მიზნებს ისახავს ქართული ოცნება საარჩევნოდ. ბაჩუკი ქარდავა იმ ცვლილებაზე ამახვილებს ყურადღებას, რომლის თანახმადაც მოსამართლეებს 10 წლიანი ვადის ამოწურვამდე, სამით თვით ადრე მნიშვნელოვანი საქმეების განხილვასა და გადაწყვეტილებაში მონაწილეობა ეკრძალებათ.

,,ფაქტობრივად, ამ კანონის მიღებით, მმართველმა პოლიტიკურმა ძალამ, გამოდის რომ თავი დაიზღვია და შეიტანა ისეთი ცვლილებები საკონსტიტუციო სასამართლოს ფუნქციონირებასთან დაკავშირებით, რომ ,,საჭიროების შემთხვევაში“ საკონსტიტუციო სასამართლო ვერანაირ გადაწყვეტილებას ვერ მიიღებს. ეს ეხება როგორც თავისუფალი სიტყვის დაცვას ქვეყანაში, ასევე არჩევნების შედეგების კონსტიტუციორობის საკითხს...ჩვენ ვნახეთ კორცხელის მოვლენები, თუმცა ეს არ არის საკითხი, რომელიც საკონსტიტუციო სასამართლოს ეხება, მაგრამ მარტივად არის შესაძლებელი, მივიღოთ ისეთი ცვლილებები არჩევნების მოახლოებასთან ერთად, რომ მას დასჭირდეს საკონსტიტუციო სასამართლოში განხილვა, იმდენად არალეგიტიმური და არაკონსტიტუციური აღმოჩნდეს არჩევნების შედეგები. ამიტომაც ვუსვამ ხაზს, რომ ,,ქართულმა ოცნებამ“ ერთგვარად თავი დაიზღვია, მე არ მინდა დეტალებში ჩასვლა, მაგრამ მარტივად გეტყვით, რომ კოლეგიაში გადაწყვეტილების მიღების 2/3-ით გაზრდა, ცვლილებები პლენუმში, აბსოლუტურად გაუგებარია. გარდა ამისა, საზოგადოების ყურადღება უნდა მიექცეს მოსამართლეების საკითხს, რომელსაც ჩვენ ვირჩევთ 10 წლის ვადით, ფაქტობრივად, მათ 3 თვით ადრე ერთმევათ უფლება მიიღონ სრულფასოვნად მონაწილეობა მნიშვნელოვანი საქმეების განხილვასა და გადაწყვეტილებაში. თუ გავითვალისწინებთ დღევანდელ ვითარებას, რომ არჩევნებისთვის 4 მოსამართლეს გასდის ვადა, მისი არჩევის რეალობა სექტემბერში, ცოტა ილუზიაა. ენას ძვალია რ აქვს და ფორმალურად შეიძლება ვიღაცამ თქვას, რომ ეს შესაძლებელია, თუ მოხდა ხელახალი არჩევა სექტემბერში, ძალიან კარგი, მაგრამ ეს რომ ძალიან რთული პროცედურაა არჩევნებამდე ერთი თვით ადრე, ფაქტია. არსებობს გონივრული ეჭვი, რომ ეს წინასწარ განსაზღვრეს კანონპროექტის ავტორებმა, რადგან სექტემბერ-ოქტომბერში ახალი შემადგენლობის დამტკიცება იქნება პრაქტიკულად შეუძლებელი და საკონსტიტუციო სასამართლო გახდება არაქმედითუნარიანი“ - აცხადებს ედპ-ს ლიდერი.

რაც შეეხება პრეზიდენტის ჩართულობას და შესაძლო ვეტოს, ბაჩუკი ქარდავა თვლის, რომ მარგველაშვილის ნაბიჯი არის ლოგიკური. ედპ-ს ლიდერი თვლის, რომ პრეზიდენტი საჭიროების შემთხვევაში ვეტოს გამოიყენებს.

,,ამ ვითარებაში, ძალიან დროული იყო პრეზიდენტის მხრიდან პროცესში ჩართვა და მე ამას კეთილ ნებად ვერ შევაფასებ, არამედ კონსტიტუციის დაცვა პრეზიდენტის პირდაპირი მოვალეობაა, რადგან ის არის კონსტიტუციის გარანტი ქვეყანაში. მისი მხრიდან აბსოლუტურად სწორი ტაქტიკური სვლაა, რომ გადაიგზავნა ვენეციის კომისიაში კანონი, რომელიც უკვე მესამე მოსმენით დამტკიცებულია პარლამენტის მიერ. ეს არის სწორი ლოგიკური დასაწყისი იმ მოსალოდნელი ქმედებებისთვის, რაც შესაძლოა ვენეციის კომისიის დასკვნას მოჰყვეს. ყველაფერმა ამან შესაძლოა მიგვიყვანოს იქამდე, რომ მივიღოთ პრეზიდენტის ვეტო გამაგრებული ვენეციის კომისიის დასკვინით.

არ მგონია ვენეციის კომისიიდან მოვიდეს დასკვნა - ჭრა-კერვა ისეთი ინსტიტუციისა, როგორიც არის საკონსტიტუციო სასამართლო, მითუმეტეს იმ ფონზე, როცა მის გარშემო პოლიტიკური აქტივობები შეინიშნებოდა და ამაზე არაერთი განცხადება გაკეთდა თავად ვენეციის კომისიის მხრიდან და მათ შორის ევროსაბჭოსა და ევროპარლამენტარებისგან. თუ პრეზიდენტი საკონსტიტუციო სასამართლოს ჭრა-კერვის შეგუებას აპირებს, მაშინ ძალიან ცუდ სურათს მივიღებთ და ეს ყველაფერი ქართული სახელმწიფოს მომავალს დარტყმის ქვეშ დააყენებს“ - აცხადებს ქარდავა.

რაც შეეხება იმას, რომ პარლამენტმა მესამე მოსმენით დამტკიცების შემდეგ გადააგზავნა კანონპროექტი ვენეციის კომისიაში განსახილველად, ქარდავა ამბობს, რომ ასეთი პრაქტიკა შეიძლება არსებობდეს, მაგრამ ეს ეხებოდეს მცირე ცვლილებების შეტანას, მაგრამ როცა საუბარია ძირეულ, პრინციპულ ცვლილებებზე, რომლითაც, ქარდავას თქმით, ჩვენ ვიღებთ სრულიად ქმედითუუნარო საკონსტიტუციო სასამართლოს, მისი გადაგზავნა მესამე მოსმენის შემდეგ, მხოლოდ დროის მოგებაა მმართველი ძალის მხრიდან.

,,თუკი ის მართლა გადაიგზავნა, გამოდის, რომ გადაიგზავნა მხოლოდ იმიტომ, რომ ამ ცვლილებების ავტორებისთვის პრინციპულია დრო. რომც მოვიდეს დასკვნა მათთვის ნეგატიური და რომც მოინდომოს დღევანდელმა უმრავლესობამ ვენეციის კომისიის თუნდაც უარყოფითი დასკვნის გათვალისწინება, თუკი ამის საშუალება 8 ოქტომბრის შემდეგ ექნება ამომრჩევლის განწყობიდან გამომდინარე, მათთვის პრობლემას აღარ წარმოადგენს, რადგან ვიმეორებ, მმართველი ძალისთვის მნიშნელოვანია წლის ბოლომდე დროის მოგება“ - აცხადებს ედპ-ს ლიდერი.