"ეს არის ქართული ოცნების შურისძიება საკონსტიტუციო სასამართლოზე" -მენაბდე მმართველი ძალის კანონპროექტზე

პოლიტიკა - 14:30, 24 May, 2016

1167

საკონსტიტუციო სასამართლოს შესახებ კანონში შესულ ცვლილებებს კონსტიტუციონალისტი ვახუშტი მენაბდე მხარს არ უჭერს.

როგორც "ნიუპოსტთან" საუბრისას მენაბდემ აღნიშნა, "ცვლილებები არის შურისძიება საკანონმდებლო ხელისუფლების მხრიდან სასამართლო ხელისუფლებაზე".

"შემოთავაზებული ცვლილებები, რომელიც ქართულმა ოცნებამ მოამზადა, ეწინააღმდეგება საქართველოს კონსტიტუციას. ის ერთის მხრივ ზღუდავს სასამართლოს კომპეტენციას, განახორციელოს კონტროლი მასზე დაკისრებული უფლება-მოსილების შესაბამისად. მეორეს მხრივ ეს კანონი საკონსტიტუციო სასამართლოს მხარეებს შორის არათანაბრად ანაწილებს პროცესის ტვირთს და არათანასწორ პირობებში აყენებს მათ. ხელისუფლების ეს ნაბიჯი ცალსახად მიმართულია საკოსნტიტუციო სასამართლოზე შურისძიებისაკენ, ვინაიდან საკონსტიტუციომ ბოლო დროს რამდენიმე ძალიან მნიშვნელოვანი გადაწყვეტილება მიიღო, რაც თანხვედრაში არ მოდიოდა "ქართული ოცნების" პოლიტიკურ დღის წესრიგთან. ამიტომ ამ ცვლილებებით საკონსტიტუციო სასამართლო სუსტდება და პარლამენტი საკუთარ მაკონტროლებელს უსუსტებს კონტროლის მექანიზმს"- აღნიშნა მენაბდემ.

კონსტიტუციონალისტი იმედოვნებს, რომ ვენეციის დასკვნა უარყოფითი იქნება.

"თუ ამ უარყოფითი დასკვნის საფუძველზე პრეზიდენტმა კანონპროექტს ვეტო დაადო, მხოლოდ ამის შემდეგ იქნება შესაძლებლობა პარლამენტმა გაითვალისწინოს პრეზიდენტის შენიშვნები და არ დაძლიოს ვეტო. ჯერ-ჯერობით არსებობს იმის შანსი, რომ დავრჩეთ კონსტიტუციურ ფარგლებში"- აღნიშნა მენაბდემ.

შეგახსენებთ, რომ მას შემდეგ, რაც გუშინ საკონსტიტუციო სასამართლოს შესახებ კანონში ცვლილებები პრეზიდენტმა პარლამენტისგან მიიღო, გიორგი მარგველაშვილმა ის, მასში შეტანილი ცვლილებებით, ვენეციის კომისიას დასკვნისთვის გადაუგზავნა.

ცნობილია, რომ სანამ პრეზიდენტი გადაწყვეტილებას მიიღებს, მოაწეროს აღნიშნულ კანონს ხელი თუ დაუბრუნოს ის პარლამენტს მოტივირებული შენიშვნებით, არასამთავრობო სექტორთან კონსულტაციებს კიდევ ერთხელ გაივლის.

ვახუშტი მენაბდე ერთ-ერთია იმათგან ვინც კონსულტაციებში იღებდა მონაწილეობას.