საქართველოს თავდაცვისა და უსაფრთხოების რიგით მეათე კონფერენცია გაიხსნა. ღონისძიება გაერთიანებული სამეფოს ჯარის, უელსის დედოფლის პოლკის პარაშუტებით მხტომელთა ჩვენებით გაიხსნა.

კონფერენციას საქართველოს თავდაცვის მინისტრი, პრემიერ-მინისტრი და უცხოელი სტუმრები ესწრებიან, მათ შორის ამერიკის შეერთებული შტატების ატლანტიკური საბჭოს აღმასრულებელი ვიცე-პრეზიდენტი, დეიმონ უილსონი.

ღონისძიება თინა ხიდაშელმა სიტყვით გამოსვლით გახსნა. მისი განცხადებით, დღევანდელი ღონისძიება სრულად ეძღვნება ვარშავის მოახლოებულ სამიტს.

„დღეს ნატო-ს ფარგლებში აქტიური დისკუსიები მიმდინარეობს შავ ზღვასთან დაკავშირებით, ყირიმის ოკუპაციამდე შავი ზღვა ითვლებოდა უსაფრთხო ზღვად და მაინცდამაინც იქ რაიმე განსაკუთრებული აქტივობა არ მიმდინარეობდა, ყირიმის ოკუპაციის შემდეგ შავ ზღვაზე ბალანსი შეიცვალა, რამაც ბუნებრივად დააყენა დღის წესრიგში ახალი მექანიზმების ამუშავების საკითხი, ამიტომ პრაქტიკულად ორი წელია ეს დისკუსია მიმდინარეობს და ჩვენ ყველას გვაქვს მოლოდინი, ერთობლივად, წევრებსაც და პარტნიორებსაც, რომ ვარშავის სამიტი ამ თვალსაზრისით იქნება ახალი სისტემის, ახალი პლათფორმის, ახალი უსაფრთხოების, არქიტექტურის დასაწყისი სწორედ შავ ზღვაზე“, - განაცხადა თინა ხიდაშელმა.