„რუსთავი 2“-ის გაჩუმება"- რა მიზანს ემსახურება საკონსტიტუციო სასამართლოს შესახებ კანონის მიღება

„რუსთავი 2“-ის გაჩუმება"- რა მიზანს ემსახურება საკონსტიტუციო სასამართლოს შესახებ კანონის მიღება - ნუგზარ წიკლაური

პოლიტიკა - 13:37, 24 May, 2016

1419

"ნაციონალური მოძრაობა" მმართველ პოლიტიკურ ძალას ვენეციის კომისიის მოტყუებაში ადანაშაულებს. საქმე ეხება პარლამენტის მიერ საკონსტიტუციო სასამართლოს შესახებ კანონის მესამე მოსმენით დამტკიცების ფაქტს.

როგორც საკითხის კომენტირებისას დეპუტატმა ,,ნიუპოსტთან" განაცხადა, "ქართული ოცნების" წევრები არწმუნებდნენ ვენეციის კომისიის წარმომადგენლებს, რომ სანამ კანონპროექტს მეორე მოსმენაზე გაიტანდნენ დოკუმენტს გადაუგზავნიდნენ და მათ რეკომენდაციებს გაითვალისწინებდნენ.

„ქართული ოცნება დაპირდა ვენეციის კომისიას, რომ სანამ მოხდებოდა მეორე მოსმენა და ამ კანონპროექტის მიღება, ჩვენ გადავუგზავნიდით მათ ამ პოზიციებს და მივიღებდით მათ რეკომენდაციებს, მაგრამ შემდეგ ეს იყო ტყუილი, ისე მიიღეს ეს კანონპროექტი, რომ არ მოხდა ვენეციის კომისიის რეკომენდაციების გათვალისწინება და არც გადაგზავნა ამ დოკუმენტის, ამიტომ მივიღეთ ის ვითარება, როდესაც სრულიად მიუღებელი კანონია მიღებული, რაც პირდაპირ ემუქრება საკონსტიტუციო სასამართლოს და ეს განპირობებულია ერთადერთი რამით, რომ „რუსთავი 2“-ის გაჩუმება მოხდეს და მისი მაუწყებლობის შეფერხება. ახლა უკვე პრეზიდენტმა დაიწყო კონსულტაციები ვენეციის კომისიასთან, ეს არის კარგი, ის მიიღებს რეკომენდაციებს და მათი გათვალისწინებით, მე ვარ დარწმუნებული, რომ პრეზიდენტი მოახდენს ამ კანონზე ვეტოს დადებას“- აღნიშნა დეპუტატმა.

23-24 მაისს საქართველოს ეროვნული უშიშროების საბჭოს მდივნის მოადგილე ლევან ბოძაშვილი და საქართველოს პრეზიდენტის მრჩეველი კახა კოჟორიძე სტრასბურგში, ვენეციის კომისიის ხელმძღვანელობასა და წარმომადგენლებთან კონსულტაციებს გამართავენ. ვიზიტის ფარგლებში დაგეგმილია შეხვედრა კომისიის პრეზიდენტთან, ჯანი ბუკიკიოსთანაც.

შეხვედრებზე განხილულ იქნება საქართველოს პარლამენტის მიერ მიღებული საკანონმდებლო პაკეტი, რომელიც საკონსტიტუციო სასამართლოს საქმიანობასთან დაკავშირებულ კანონმდებლობაში ცვლილებებს ითვალისწინებს.

სავარაუდოდ სწორედ ამ შეხვედრის შემდეგ გადაწყვეტს პრეზიდენტი დაადებს თუ არა საკონსტიტუციო სასამართლოს შესახებ კანონს ვეტოს.