დღეს ვაზიანის პოლიგონზე ქართულ-ამერიკული სწავლება დასრულდა. წვრთნაში მონაწილე სამხედრო მოსამსახურეებმა ერთობლივი ოპერაცია - ობიექტზე შეტევის ამოცანა შეასრულეს. პროცესში ჩართული იყო ქართული და ამერიკული ჯავშანტექნიკა, ავიაცია და არტილერია.

ვაზიანის პოლიგონზე საქართველოს თავდაცვის მინისტრი, გენშტაბის უფროსი, აღმასრულებელი ხელისუფლების წარმომადგენლები, პრეზიდენტის ადმინისტრაციისა და „ნაციონალურო მოძრაობის“ წევრები იმყოფებოდნენ.

სწავლებამ „ღირსეული პარტნიორი 2016“ მაღალი შეფასება დაიმსახურა როგორც ამერიკელი, ასევე ნატოს სამხედრო მაღალჩინოსნებისგან.

„არის თუ არა საქართველო მზად ნატოს წევრობისთვის, ეს პოლიტიკური პროცესია, ჩემთვის კი ქართველ სამხედროებთან ერთად, ნებისმიერ ადგილზე სამსახური საამაყოა,“ - განაცხადა აშშ-ის არმიის ევროპული ჯარების სარდალმა, ბენ ჰოჯესმა.