საარჩევნო უბანთან ძალადობა, ან ძალადობის მუქარა სისხლის სამართლის კოდექსით დაისჯება. იუსტიციის სამინისტროს პრემიერის მიერ მოთხოვნილი ცვლილება უკვე მზად აქვს, მას თეა წულუკიანი პარასკევის მთავრობის სხდომაზე წარადგენს. იუსტიციის მინისტრის თქმით ანალიტიკურმა დეპარტამენტმა რამდენიმე ქვეყნის მოდელი შეისწავლა, პროექტი მთავარ პროკურატურას უკვე გააცნეს.

„სისხლის სამართლის კოდექსში დაემატოს ახალი მუხლი, რომელიც სისხლის სამართლებრივი წესით დასჯადს გახდის ძალადობას ან ძალადობის მუქარას, საარჩევნო უბანზე, წინასწარი საარჩევნო კამპანიის ან აგიტაციის ადგილას, ან თუნდაც მათ მიმდებარე ტერიტორიაზე. თუ საქმე გვაქვს ჯგუფურად ჩადენილ ქმედებასთან, აქ შეიძლება ჩვენი შეთავაზებით სანქცია 4 წლამდე პატიმრობაზეც კი გავიდეს, ხოლო მსუბუქ შემთხვევებში, სადაც პირს არ მიუღია ფიზიკური დაზიანება, სასჯელი, რომელსაც ექნებოდა გადამარწმუნებელი ეფექტი, შეიძლება იყოს ჯარიმა და ორ წლამდე თავისუფლების აღკვეთა“, - განაცხადა თეა წულუკიანმა.