საქართველოს თავდაცვის მინისტრი, თინა ხიდაშელი გუშინ არჩევნების მიმდინარეობისას სოფელ კორცხელში მომხდარი დაპირისპირების ფაქტს ეხმაურება. „პალიტრა ნიუსის“ ეთერში თემის კომენტირებისას, სახელმწიფო მინისტრმა მომხდარს „გზა ქაოსისკენ“ უწოდა:

”ის, რაც ჩვენ გუშინ ვნახეთ სამეგრელოში, ეს არის გზა ქაოსისკენ, ზუსტად ისევე, როგორც ხდებოდა წლების განმავლობაში და მე მზარავს იმის გაფიქრებაც კი, რომ შემდეგი თვეების განმავლობაში, ჩვენს ქვეყანაში წინასაარჩევნო კამპანია იწყება და შეიძლება რაიმე ამის მაგვარი მივიღოთ. ძალიან ბევრმა, გუშინდელი ამბავი შეაფასა, როგორც რაღაც წინასაარჩევნო რეპეტიცია და მე ძალიან დიდი იმედი მაქვს, რომ რეაგირება იქნება მყისიერი და ძალიან მკაცრი, იმისათვის, რომ ვერავინ გაივლოს თავში საპარლამენტო არჩევნების წინ მსგავსი რამ. ის, რაც გუშინ ვნახეთ, ეს არ არის ევროპული საქართველო. სწორედ ხელისუფლების ვალია, რომ ეს ქაოსი არ დაუშვას ამ ქვეყანაში და მე იმედს ვიტოვებ, რომ ეს ასე იქნება”, - განაცხადა თავდაცვის მინისტრმა.