ევროკავშირთან ასოცირების შეთანხმება 1 ივლისიდან სრულად ამოქმედდება- მიხეილ ჯანელიძე

პოლიტიკა - 18:34, 23 May, 2016

2334

ბრიუსელში გაიმართა „აღმოსავლეთ პარტნიორობის" საგარეო საქმეთა მინისტრთა რიგით მეშვიდე შეხვედრა, რომელსაც თავმჯდომარეობდა საგარეო საქმეთა და უსაფრთხოების პოლიტიკის საკითხებში ევროკავშირის უმაღლესი წარმომადგენელი, ევროკომისიის ვიცე-პრეზიდენტი, ფედერიკა მოგერინი. მინისტერიალში მონაწილეობა მიიღეს ევროპული სამეზობლო პოლიტიკისა და გაფართოების მოლაპარაკებათა საკითხებში ევროკომისარმა, იოჰანეს ჰანმა, „აღმოსავლეთ პარტნიორობის" ექვსი პარტნიორი ქვეყნის, ასევე ევროკავშირის წევრი ქვეყნების საგარეო საქმეთა მინისტრებმა და მაღალი რანგის ოფიციალურმა პირებმა. მინისტერიალს, ასევე ესწრებოდნენ ევროპის საინვესტიციო და ევროპის რეკონსტრუქციისა და განვითარების ბანკების წარმომადგენლები. ქართულ დელეგაციას შეხვედრაზე ხელმძღვანელობდა საგარეო საქმეთა მინისტრი, მიხეილ ჯანელიძე.

მინისტერიალი გაიხსნა საგარეო საქმეთა და უსაფრთხოების პოლიტიკის საკითხებში ევროკავშირის უმაღლესი წარმომადგენლის ფედერიკა მოგერინისა და ევროპული სამეზობლო პოლიტიკის და გაფართოების მოლაპარაკებათა საკითხებში ევროკომისარის იოჰანეს ჰანის მისასალმებელი სიტყვით.

საქართველოს საგარეო საქმეთა მინისტრის მიხეილ ჯანელიძის განცხადებით, ევროკავშირთან ასოცირების შეთანხმება 1 ივლისიდან სრულად ამოქმედდება.

"დღევანდელ შეხვედრაზე ქალბატონმა მოგერინიმ აღნიშნა, რომ განიხილება საგარეო საქმეთა მინისტრების საბჭოს ფარგლებში საქართველოს ასოცირების შეთანხმების საბოლოდ ძალაში შესვლის შესახებ, რაც ძალიან მნიშვნელოვანი მოვლენა არის. ძალიან მოკლე დროში მოხდა ევროკაშირის ყველა წევრი ქვეყნის პოლიტიკური მხარდაჭერის მოპოვება საქართველოსთან ასოცირების შეთანხმების კუთხით და იგი სრულად ამოქმედდება 1 ივლისიდან. როგორც მოგეხსენებათ, ასოცირების შეთანხმება პირობითად ძალაშია შესული 2014 წლის 1 სეტემბრიდან. ჩვენ ვისაუბრეთ იმაზეც, თუ რა დადებითი შედეგები მოუტანა საქართველოს ასოცირების შეთანხმების პირობითად ამოქმედებამ. ასევე ვისაუბრეთ იმ პოლიტიკურ შედეგებზე, რაც დემოკრატიული განვითარების კუთხით მოიტანა ასოცირების დღის წესრიგის იმპლემენტაციამ. ვისაუბრეთ ასევე სამომავლო დღის წესრიგზე, რომელიც იქნება კიდევ უფრო ამბიციური და კიდევ უფრო მეტი ინტეგრაციის საშუალებას მისცემს საქართველოს. პოლიტიკური ინტეგრაციის კუთხით ხაზი გავუსვით მნიშველობას, რომ ასოცირების შეთანხმების ქვეყნებისთვის უფრო მეტი შესაძლებლობები უნდა იყოს დ აუფრო ღიად უნდა იყოს საუბარი შემდგომ ღრმა ინტეგრაციაზე, ასევე იმ ინსტრუმენტებზე, რომლებიც ევროკავშირმა ასოცირებული ქვეყნების მიმართ უნდა გამოიყენოს"-აღნიშნა მიხეილ ჯანელიძემ.