საქართველოს ცენტრალური საარჩევნო კომისიის თავმჯდომარე, თამარ ჟვანია ევროკავშირის ელჩს საქართველოში იანოშ ჰერმანს შეხვდა. შეხვდრის შემდეგ ჰერმანმა ჟურნალისტებისთვის კომენტარი გააკეთა. დიპლომატის განცხადებით, შეხვედრისას განიხილეს ის ძალადობრივი ფაქტი, რომელიც გუშინ კორცხელში მოხდა:

"ჩვენ განვიხილეთ 2016 წლის არჩევნების სამზადისი. თქვენ იცით, რომ ევროკავშირმა არჩევნებისთვის მედია-მონიტორინგის დაფინანსების გადაწყვეტილება მიიღო და ჩვენი მსჯელობის ერთ-ერთი მთავარი თემა სწორედ ეს იყო. ცხადია საუბრისას განვიხილეთ ის ძალადობრივი ინციდენტი რომელსაც გუშინ კორცხელში ჰქონდა ადგილი. სრულყოფილად მომაწოდეს ინფორმაცია იმის შესახებ რაც მოხდა. მინდა აღვნიშნო, რომ ჩვენ ყურადღებით ვადევნებთ თვალს იმ განცხადებებს, რომელიც სხვადასხვა პოლიტიკური პარტიისა და სამოქალაქო სექტორის წარმომადგენლებმა გააკეთეს. ჩვენ მივესალმებით პრეზიდენტის და პრემიერის განცხადებას, სადაც ნათქვამია, რომ სრულყოფილად უნდა იქნეს გამოძიებული ეს ფაქტი. მთავრობის პასუხისმგებლობაა უზრუნველყოს მშვიდობიანი საარჩევნო გარემო“ - განაცხადა იანოშ ჰერმანმა.