„ახალი მემარჯვენეები“ კორცხელში მომხდარ ინცინდენტზე პასუხისმგებლობას ხელისუფლებას აკისრებენ. ამასთან დაკავშირებით პარტიამ სპეციალური განცხადება გაავრცელა, რომლსაც "ნიუპოსტი" უცვლელად გთავაზობთ

სოფელ კორცხელში ადგილობრივი თვითმმართველობის შუალედური არჩევნების მიმდინარეობისას მომხდარმა ინცინდენტმა მთელ საქართველოს გაახსენა ის ძალადობრივი ფონი, რომლითაც ხასიათდებოდა ნაციონალური მოძრაობის ხელისუფლებაში ყოფნის პირობებში ჩატარებული არჩევნები. იყო მოლოდინი, რომ „ქართული ოცნება“ უზრუნველყოფდა არჩევნების ჩატარებას ძალადობის გარეშე. სამწუხაროდ, კორცხელის ინცინდენტმა დაგვანახა, რომ ქვეყანაში არაფერი შეცვლილა და ქართული არჩევნების განუყოფელ ნაწილად კვლავ რჩება ფიზიკური დაპირსიპირება, ცემა-ტყეპა და ადამიანების შეურაცხყოფა.

ცხადია, არჩევნების მშვიდ გარემოში ჩატარებაზე პასუხისმგებლობა მთლიანად ეკისრება ხელისუფლებას, რადგან სწორედ მის დაქვემდებარებაშია შესაბამისი ორგანოები, რომლებიც ვალდებულნი იყვნენ მიეღოთ პრევენციული ზომები, დროულად ჩარეულიყვნენ დაპირისპირებაში და აღეკვეთათ ფიზიკური ძალადობა.

2016 წლის არჩევნების წინ მსგავსი ინცინდენტი სერიოზულ ეჭვს აჩენს, რომ ხელისუფლება, რომელიც 22 მაისის შუალედურ არჩევნებზე თვითონ მოგვევლინა დაპირისპირების ინსპირატორად, მომავალ უმნიშვნელოვანეს საპარლამენტო არჩევნებზე ვერ უზრუნველყოფს წესრიგს და თავიდან ვერ აგვაცილებს ოპონენტებზე ძალადობას. შესაძლოა 8 ოქტომბრის საპარლამენტო არჩევნები სამოქალაქო დაპირისპირების დასაწყისად იქცეს, რაც ყოვლად დაუშვებელია და ყველაფერი უნდა გაკეთდეს იმისთვის, რომ ეს არ მოხდეს.

ამის პრევენციის ერთადერთი საშუალებაა დაუყოვნებლივ აგებინონ პასუხი დამნაშავეებს და პოლიციის ადგილობრივი ორგანოების ხელმძღვანელობას, რომელთაც ვერ შეძლეს საარჩევნო უბნებზე წესრიგის უზრუნველყოფა.

„ახალი მემარჯვენეები“ ვგმობთ მომხდარ ძალადობას და მოვუწოდებთ სამართლადამცავ ორგანოებს ოპერატიულად უზრუნველყონ კორცხელის ინცინდენტში მონაწილე დამნაშავე პირების იდენტიფიცირება და მათ მიმართ კანონით გათვალისწინებული ზომების მიღება."- აღნიშნულია განცხადებაში.