კორცხელში მომხდარ დაპირისპირებას საქართველოს პრემიერ-მინისტრი გიორგი კვირიკაშვილი გამოეხმაურა. პრემიერის განცხადებით მომხდარი არის დასაგმობი ინციდენტი და საქართველოს სახელმწიფოს ღირსებაა, რომ მომავალი არჩევნები მშვიდობიან გარემოში ჩატარდეს:

„ის რაც მოხდა არჩევნებზე სამეგრელოში არის მიუღებელი და ასეთი პრეცენდენტები აღარ უნდა გამეორდეს, ჩვენ ერთხელ და სამუდამოდ უნდა გადავშალოთ ფურცელი, როდესაც არჩევნები ტარდებოდა ძალადობით. მუშტიკრივით არ უნდა გადაწყდეს, მოსახლეობამ ვინ უნდა აირჩიოს საქართველოს სამართავად.

ეს არის დასაგმობი ინციდენტი, ვფიქრობთ, რომ მომავალში უფრო მეტი მობილიზაცია იქნება სამართალდამცავების მხრიდან საჭირო, რათა ასეთი ინციდენტები აღარ გამეორდეს. ეს ინციდენტი უნდა იქნას გამოძიებული და დამნაშავეები დაისაჯონ, ეს იქნება სახელმწიფოს ღირსების საკითხი, რომ ჩვენ ჩავატაროთ მშვიდობიანი არჩევნები და მივცეთ საშუალება ჩვენს თანამოქალაქეებს, ყველანაირი ძალადობის გარეშე, მშვიდობიან გარემოში მისცენ ხმა მათ რჩეულს“, - განაცხადა გიორგი კვირიკაშვილმა.