,,მოუწოდებთ შს სამინისტროს, მისცეს დანაშაულს სწორი კვალიფიკაცია“

,,მოუწოდებთ შს სამინისტროს, მისცეს დანაშაულს სწორი კვალიფიკაცია“ - სდლ კორცხელის ინციდენტს ეხმაურება

პოლიტიკა - 21:10, 22 May, 2016

1715

ზუგდიდის რაონის სოფელ კორცხელში ,,ნაციონალური მოძრაობის“ ლიდერების წინააღმდეგ განხორციელებულ ფიზიკურ ძალადობას განცხადებით ეხმაურება ,,სამართალდამცავთა დაცვის ლიგა“. ყოფილი სამართალდამცავები მომხდარს ვანდალიზმს უწოდებენ და სამართლებრივ დეტალებზე მიუთითებენ. არასამთავრობო ორგანიზაციის წევრები შს სამინისტროს მოუწოდებენ დანაშაულს სწორი კვალიფიკაცია მისცეს.

,,2016 წლის 22 მაისს, ზუგდიდის მუნიციპალიტეტის სოფელ კორცხელში, პირთა ჯგუფის მიერ, სასტიკად იყვნენ ნაცემი ოპოზიციური პარტიის ლიდერები, პარლამენტის დეპუტატები და მათი მხარდამჭერები. ამ ვანდალიზმის მომწყობებმა, სოფლის ცენტრში შეკრებილი მოსახლეობის თვალწინ, არჩევნების დღეს, საარჩევნო უბანთან და მის მიმდებარედ, უხეშად დაარღვიეს საზოგადოებრივი წესრიგი, გამოხატეს საზოგადოებისადმი აშკარა უპატივცემულობა და უხეში ძალადობისა და ძალადობის მუქარის გამოყენებით სასტიკად გაუსწორდნენ ოპოზიციური პარტიის წარმომადგენლებს.

სახეზე გვაქვს აშკარა ხულიგნობა, ანუ საქ. სსკ-ის 239-ე მუხლის მე-2 და მე-3 ნაწილებით გათვალისწინებული დანაშაული, როცა დანაშაული ჩადენილია წინასწარი შეთანხმებით, ჯგუფის მიერ და სხვადასხვა საგნების გამოყენებით. დანაშაული, რომელიც გრძელდებოდა 15-20 წუთის განმავლობაში, მთლიანად მოიცავდა ხულიგნობის მოტივს, რაც გამოიხატებოდა, საზოგადოებისა და პიროვნების ღირსების დამამცირებელი და ცინიკური შელახვის დაკმაყოფილების სწრაფვაში.

სამწუხაროა, რომ შსს-ს ხელმძღვანელობის მხრიდან, შეტყობინებების მიუხედავად, დროულად არ მოხდა დანაშაულის აღკვეთა. აღსანიშნავია, რომ დანაშაულის ჩამდენი პირები, საკუთარ ვინაობას კამერების წინ არ მალავდნენ.

არასამთავრობო ორგანიზაცია „სამართალდამცავთა დაცვის ლიგა“ მოუწოდებს შს სამინისტროს, მისცეს დანაშაულს სწორი კვალიფიკაცია და დაუყოვნებლივ გაატაროს ყველა ოპერატიულ-საგამოძიებო ღონისძიება, დანაშაულის ჩამდენი პირების მიმართ. გთხოვთ, თქვენი უმოქმედობით არ შელახოთ პოლიციის რეპუტაცია, რაც მძიმედ აისახება მომავალში საზოგადოებრივი წესრიგის დაცვაზე. ნუ დაგვავიწყდება, რომ ძალადობა შობს ძალადობას!“ - ნათქვამია ,,სამართალდამცავთა დაცვის ლიგის“ განცხადებაში.