,,თავისუფალი დემოკრატები“ კორცხელის ინციდენტს საგანგებო განცხადებით ეხმაურებიან

პოლიტიკა - 20:43, 22 May, 2016

3684

„თავისუფალი დემოკრატები“ კორცხელში მომხდარ ინციდენტს საგანგებო განცხადებით ეხმაურებიან. ალასანიას გუნდი მომხდარს პოლიტიკური ოპონენტების წინააღმდეგ ჩადენილ ფიზიკურ და მორალურ ძალმომრეობას უწოდებს და ფაქტის დაუყოვნებლივ გამოძიებას ითხოვს.

,,ჩვენ „თავისუფალი დემოკრატები“ პრინციპულად ვგმობთ კორცხელში მომხდარ ძალადობას, რადგან ეს არის ადამიანების უფლებების ხელყოფა; ეს ქმედებები დღეს ჩვენთვის ისევე მიუღებელია, როგორც წინა ხელისუფლების დროს განხორციელებული ძალადობა. ამასთნავე ეს არის პოლიტიკური ოპონენტების წინააღმდეგ ჩადენილი ფიზიკური და მორალური ძალმომრეობა.

მომხდარი კატასტროფულად აზიანებს ზოგადად ქვეყნის დემოკრატიულაბას და, კერძოდ, საარჩევნო პროცესის ობიექტურად, სამართლიანად წარმართვის შესაძლებლობასა და პერსპექტივას. ამგვარი დანაშაულებრივი ქმედება უშუალოდ ზღუდავს ამომრჩევლის თავისუფლებას, რადგან უკიდურესად უარყოფითად ზემოქმედებს მის უფლებაზე, გააკეთოს დამოუკიდებელი არჩევანი.

მოვუწოდებთ სამართალდამცავებს, დაუყოვნებლად დაიწყონ გამოძიება, რათა გამოვლინდეს და უმკაცრესად დაისაჯოს მომხდარი დანაშაულის ყველა დამკვეთი, წამქეზებელი და უშუალო შემსრულებელი“- ნათქვამია ,,თავისუფალი დემოკრატების“ განცხადებაში.